Dei skal leie arbeidet med kommunedeling

Petter Sortevik er oppnemnd som prosjektleiar for oppretting av Haram 2024, og Regine Bruteig er prosjektleiar for Ålesund 2024, opplyser Ålesund kommune i ei pressemelding.

Gamle Haram kommune skal vere på plass igjen frå 1. januar 2024, og i pressemeldinga blir det opplyst at ein no er inne i eit rekrutteringsløp for tilsetjing av ny kommunedirektør/prosjektleiar for Haram kommune. Rekrutteringsutvalet vil truleg fatte ei avgjerd innan utgangen av 23. september.

For å sikre framdrift i eit stramt tidsløp vil Petter Sortevik vere prosjektleiar for Haram 2024. Sortevik har vore konstituert avdelingsleiar for arbeidsgivaravdelinga, HR, i Ålesund kommune. Han var og ansvarleg for seksjon for personal- og organisasjonsutvikling i tidlegare Haram kommune.

- Krevjande prosess
I tillegg er Regine Bruteig tilsett som prosjektleiar for Ålesund 2024. Ho er frå før tilsett i kommunen som rådgivar i vatn og avløp. Begge prosjektleiarane rapporterer direkte til kommunedirektøren.

- Eg er veldig glad for at begge prosjektleiarane har takka ja til å bidra i arbeidet med kommunedelinga. Det er viktig at vi har nok ressursar til for å holde oppe framdrifta. Det blir ein krevjande prosess, og det er viktig at vi har flinke folk med på laget, seier kommunedirektør Jon Steven Hasseldal, i pressemeldinga.

Delprosjekt
Det er også oppnemnd prosjektleiarar for delprosjekt innanfor ulike fagområde. Desse er:

• HR Roar Reiten

• Økonomi Lars Fylling

• IKT Helge Veum

• Politisk sekretariat Dagrun Lorgen Jensen

• Avtalar/samarbeid Kariann Bigset