Denne bedrifta har rekordomsetning

- Det ser veldig bra ut. Først halvår var det beste nokon gong, og juni var også den beste junimånaden vi har hatt.
- No kan alle tilsette ta ein vel fortent sommarferie.
Det seier adm. dir Håkon Holen ved Fiskevegn på Flatraket i Selje.
Han overtok som toppsjef i mai i fjor.
- Eg bur i Ålesund, der vi også har avdeling, men eg vekependlar til Flatraket.

Solid resultat

Totalt omsette selskapet for 106,0 millionar i fjor, og sat att med eit resultat før skatt på 13,4 millionar.
- I første halvår i år er omsetninga godt over 60 millionar, seier Holen.
Bedrifta er av dei store på leveransar på liner og utstyr til lineflåten.
- Vi har hatt fleire store kontraktar, seier Holen.

Aukar staben

Ein del av utstyret vert laga ved det 50 prosent eigde selskapet Magistr-Fiskevegn Group i Latvia, men det er ikkje snakk om å trappe ned aktiviteten på Flatraket.
- Nei, vi skal utvikle oss vidare, og skal blant anna no tilsetje teknisk sjef og sjef for forsyningskjeda.
Totalt er det rundt 35 tilsette i selskapet, der fleire har vore med i 40 år eller meir.
- Dette tek eg som eit teikn på at Fiskevegn er ein god arbeidsplass. Samstundes er det no på gang eit generasjonsskifte.
- Hittil har det ikkje vore problem å få tak i nye dyktige tilsette, seier Holen.

Ingen koronaproblem

Han opplyser at selskapet ikkje har merka koronakrisa økonomisk.
- Vi sette i verk ei rekkje tiltak, blant anna innførde reiserestriksjonar, men hos oss har det i heile denne perioden vore full produsjon.
I tillegg til investeringa i Latvia, eig Fiskevegn-konsernet 100 prosent av selskapa Flatraket Industribygg og Best Fishing Gear i Selje, samt eigedomsselskapet Storvika i Ålesund.
Konsernet har ein samla eigenkapital på 63,7 millionar kroner, og ei langsiktig gjeld på 9,1 millionar kroner.
Eigarar er Helge Solheim og Mustad Sealine, med halvparten på kvar.