Vil verte den leiande havregionen i verda

Vestlandsrådet lanserer no ein svært ambisiøs næringsstrategi for fylka Rogaland, Vestland og Møre og Romsdal.

Strategien ser utarbeida i tett samarbeid aktørar frå næringslivet, akademia og FOU-miljø langs heile Vestlandet.

- Enorme mulegheiter
I ei pressemelding blir det vist til at strategien byggjer på regionen sine komparative fortrinn der havet og naturen gir enorme moglegheiter for vekst.

Vestlandet har potensialet til å ta posisjonen som den fremste havregionen – ikkje berre i norsk næringsliv, men også internasjonalt, vert det fastslått.

- Med denne næringsstrategien ønskjer Vestlandsrådet å skape eit endå sterkare fundament for samarbeid, vekst og berekraftig utvikling i regionen, seier Per Vidar Kjølmoen, fylkesvaraordfører i Møre og Romsdal (Ap) og leiar for styringsgruppa for ny næringsstrategi.

Må lære av olje og offshore
Det vert vist til at med utarbeiding av ein felles næringsstrategi, vil Vestlandet stå endå sterkare saman om næringsutviklinga i landsdelen.

- På same måte som vi bygde olje- og offshorenæringa på skuldrane til shipping, må vi framover byggje nye næringar på skuldrane til olje- og offshorenæringa.

- Mykje av den leiande kunnskapen og teknologien opparbeida i den næringa kan bli overført og brukt innan andre, veksande havnæringar, seier Sigrid Brattabø Handegard i hovudutval for næring i Vestland fylke, i pressemeldinga.

Vil ha fleire offentlege arbeidsplassar
Næringsstrategien peikar óg på behovet for å bli betre på å eksportere kunnskap og teknologi.

- Vestlandet har tradisjonelt vore veldig sterke på råvareeksport, no skal vi bli minst like flinke på teknologieksport, seier leiar Solveig Ege Tengesdal i Opplæringsutvalet i Rogaland fylkeskommune.

Næringslivet ønskjer at den statlege styringa og forvaltninga skal sitje tettare på naturressursane og næringsmiljøa dei skal fremje.

- Vi skal difor jobbe for å få fleire offentlege arbeidsplassar til Vestlandet, samstundes som vi sikrar at Vestlandet oppnår ein rettmessig representasjon i dei utval og beslutningsorgan som legg føringane for næringsutviklinga i vår landsdel, seier Kjølmoen.

Skal styrke landsdelen
Vestlandsrådet er eit politisk samarbeidsråd mellom fylkeskommunane i Rogaland, Vestland og Møre og Romsdal.

Rådet er danna for å styrke landsdelen, både nasjonalt og internasjonalt, og utgjer ei politisk kraft som er sterkare enn den dei deltakande fylkeskommunane er kvar for seg.

Vestlandsrådet består av representantar frå fylkestinget sine medlemmer i dei ulike fylka.

Leiinga av Vestlandsrådet går på omgang og i 2021 har Møre og Romsdal fylkeskommune med leiinga.