Ekornes hentar Havfisk-sjefen

Ekornes ASA har hatt Olav Holst-Dyrnes som kandidat til konsernsjefjobben i lenger tid. No skifter han beite, frå fiskeriselskapet Havfisk til møbelkonsernet Ekornes.
- Vi har snakka med han i fleire rundar. No fall alt på plass, seier styreleiar Kjersti Kleven.

Kan få med seg folk

Kleven legg spesielt vekt på Holst-Dyrnes sine evner til få folk med seg, når ho grunngjev kvifor styret ville han han.
- Han har vist at han har gjennomført prosessar der han har fått med seg heile organisasjonen. Han har ein leiarstil som involverer. Det er ein viktig dimensjon for Ekornes sin del, seier Kleven.
Styret i Ekornes skriv i ei børsmelding at det har lagt vekt på å finne ein målretta leiar som har vist evne til å drive forandring, har gode leiareigenskapar og solide strategiske evner.

Lang prosess

Ekornes-konsernet har vore på jakt etter ny toppsjef heilt sidan Øyvind Tørlen trekte seg etter usemje med styret i desember 2012.
Tidlegare toppsjef Nils-Fredrik Drabløs vart henta inn som ny leiar, medan styret jakta på Tørlen sin etterfølgjar. Drabløs var administrerande direktør frå 1996 til Tørlen tok over i 2006.
Holst-Dyrnes skal byrje i Ekornes seinast 1. desember 2014.

Gav opp buplikt

Jakta på ny sjef har tatt lenger tid enn opphavleg venta, og undervegs har styret mellom anna fira på kravet om at den nye toppsjefen må bu på Sunnmøre for å greie å lokke til seg folk. (sjå relaterte saker).
Ved årskiftet nullstillte styret heile prosessen, og skifta ut rådgjevarane. Rekrutteringselskapet Visindi fekk jobben med å hjelpe til i jakta på ny sjef.

Bur i Ålesund

Med Holst-Dyrnes på plass får Ekornes likevel ein sjef som bur på Sunnmøre.
- Han bur i Ålesund. Det er ein god ting, når alt anna klaffa og kvalifikasjonane er på plass, seier Kleven.
Holst-Dyrnes er leiar for det børsnoterte fiskebåtreiarlaget Havfisk ASA.

Reite på jakt etter erstattar

Medan toppsjefjakta er over for Kjersti Kleven og Ekornesstyret sin del, må styreleiar Frank O. Reite i Havfisk finne ein erstattar for Holst-Dyrnes.
- Styret i Havfisk vil takke Holst-Dyrnes for innsatsen i den perioda har leia selskapet og ønskjer lykke til med ny oppgåver, seier Reite i ei børsmelding.
Reite vil ikkje seie noko om tidsperspektivet Havfisk har i jakta på ein ny leiar, og trur Holst-dyrnes kjem til å gjere ein god jobb for sin nye arbeidsgivar.
- Olav har vore ein veldig fin leiar. Han har bygd opp eit sjølvstendig selskap etter at Aker Seafoods blei delt (i fiskebåtreiarlaget Havfisk og fiskerindustriselskapet Norway Seafoods, red. merk), seier Reite.

Fallande lønsemd

Holst-Dyrnes sitt viktigast mål er å få opp lønsemda.
- Vi har har hatt ein stilleståande periode i nokre år, med marginar som går nedover. Det er ein ting vi må snu, seier Kleven.
Siste kvartalsrapport melde mellom anna om at det buttar imot i den viktige tyske marknaden, som har vore stabil og god gjennom mange år.