Ekstra utbytte frå Sparebanken Møre

I vår vedtok Sparebanken Møre å dele utbytte på 4,5 kroner per eigenkapitalbevis etter 2020, men opna samstundes for at det kunne bli meir seinare. No har styret i banken vedtatt å dele ut eit tilleggsutbytte på ni kroner per eigenkapitalbevis etter nok eit godt kvartal for banken (sjå tabell).

Tilleggsutbyttet utgjer til saman 89 millionar kroner.

Les børsmelding her

Meir gåvemidlar
Sparebanken Møre er delvis sjølveigande (50,4 prosent) og delvis eigd av investorar (49,6 prosent). Når investorane får utbytte blir det samstundes sett av pengar som blir delt ut til det banken meiner er samfunnsnyttige formål.

Med det siste utbyttevedtaket betyr det at det er sett av til saman 135 millionar kroner som skal delast ut som gåvemidlar frå banken.

Mest låneauke til næringslivet
Dei siste 12 månadane har samla utlån frå Sparebanken Møre auka med 6,2 prosent.

Utlån til næringslivet har auka med 10,3 prosent, til private med 4,3 prosent.

Banken ventar at den samla utlånsveksten i 2021 vil ende på omlag fem prosent.