Emisjon og leiarskifte i L.K. Hjelle

- Det er primært lokale/regionale investorar som har tru på både bedrifta og framtida, seier Bjørn Gjerde i bedriftsrådgivingselskapet MRB om kven som går inn som medeigarar i L.K. Hjelle Møbelfabrikk.
Dagens eigarar blir med vidare. Førebels er det for tidleg å gå ut med kor mykje pengar som blir skote inn i selskapet og den nøyaktige aksjonærsamansettinga etter emisjonen, i følgje Gjerde.

Vekstpotensiale

Pengane frå emisjonen skal først og fremst gå til å styrkje sal og marknadsføring. Målet er å skape vekst.
Selskapet har allereie ein eksportandel på over 35 prosent, og det skal bli meir.
- Bedrifta har eit veldig stort internasjonalt potensiale, seier Gjerde.

Siesta-suksess

L.K. Hjelle rettar seg mot godt betalande kundar og har ein produksjon med eit høgt innslag av handverk.
I 2014 kjøpte selskapet retten til å produsere Siesta-stolane, ein over 50 år gamal designklassikar i norsk møbelindustri. Siesta-stolen blei brukt til å løfte selskapet i eksport-marknaden. Saman med eit gjennomslag i USA er Siesta-satsinga mykje av forklaringa på at selskapet gått frå 29 millionar kroner i driftsinntekter i 2013 til 39 millionar kroner i driftsinntekter i 2017.
Men lønsemda har vore svak i mange år, og 2017 enda med eit lite underskot (sjå tabell).
Før emisjonen har L.K. Hjelle fem eigarar; Dag Frode Hjelle sitt selskap Hjelle Distribusjon (51,61 prosent), Bjørn og Trond Hjelle (17,74 prosent kvar) og Runar og Bengt Hjelle (6,45 prosent kvar).