Enorm interesse for skredkurs på nett

- Ja, første kvelden var vi 1.900, og vi håper å passere over 1.000 også tysdag kveld.
Det seier dagleg leiar Oscar Almgren i det Stranda-baserte selskapet.
På webinaret tysdag vil deltakarane blant anna få tips om korleis ein kan ferdast sikkert i fjellet, og korleis ein førebyggjer og unngår farlege situasjonar.
- Vi har allereie over 600 påmelde til i kveld, og det tikkar inn nye påmeldingar heile tida.
- Vi har påmelde frå heile Norge, men også frå Sverige, seier Almgren, som sjølv kjem frå Stockholm.

Nettkurs på engelsk

No er det planen å ha eit kurs også på engelsk.
- Ja, interessa er så stor at vi arbeider med eit webinar på engelsk.
Almgren seier at det er koronakrisa som har sett fart på arbeidet med dei nettbaserte kursa.
- Dette var eigentleg noko vi hadde tenkt på før, men no var det på tide å gjennomføre planane. Vi ser også på andre kurs, seier Almgren.
Han etablerte Uteguiden i 2008, med base på Stranda, og etablerte i tillegg Ålesund-avdeling i 2018.
Selskapet har hatt stor vekst, vart i 2018 kåra til årets reiselivsbedrift av Innovasjon Norge.

Starta året godt

Også 2020 starta veldig bra.
- Ja, det såg veldig bra ut, men i løpet av dei tre første dagane med koronarestriksjonar i Norge, miste vi turbestillingar for 600.000 kroner.
No har alt stoppa opp, og alle dei sju turguidane er permitterte.
Almgren håper ikkje at heile sesongen er øydelagt.
- Problemet er at vi ikkje veit når vi på nytt kan starte med aktivitetar, men det er heilt klart at 2020 vert eit utruleg vanskeleg år for Uteguiden.
- Det er akkurat i denne perioden av året vi har mest aktivitet.

Håper på kraftig rekyl

Han håper at det er muleg å få kompensert nokre av kostnadene.
- Ja, vi har ein del faste kostnader, og med tilnærma null i inntekter, vert dette vanskeleg å handtere.
Han håper på ein kraftig rekyl når koronakrisa er over.
- Vi håper og trur at det vert eit ekstra behov for å padle, gå toppturar, klatre og andre fysiske aktivitetar. Interessa på webinara gir i alle fall grunn til optimisme.

- Ikkje som normalt i Sverige

Almgren synst også det er interessant å følgje med kor ulikt svenske og norske styresmakter handterer koronakrisa, der svenske styresmakter seier bør der norske seier må.
- Det vert utruleg spennande å sjå kva for modell som faktisk har best effekt.
Men Almgren seier at dersom nokon trur at livet går som normalt i Sverige, så er det fullstendig feil.
- Eg har masse venner i Stockholm, og får stadig bilde av tomme gater, tomme restaurantar og tomme bussar.
- Også i Sverige tar folket dette på aller høgste alvor, men utan dei mange forboda og påboda som ein har i Norge.