Får ikkje gå til hamn med 100 legar og ekspertar

Skipet ligg no utanfor den chilenske hamnebyen Puenta Arenas.
Ifølgje avisa har dei vel 100 passasjerane om bord vore ein del av eit vitskapleg cruise til Falklandsøyane, Antarktis og dei chilenske fjordane.

Forbod til september

Cruiset starta 29. februar, og skulle vere avslutta tysdag, men på grunn av at dei chilenske styresmaktene har innført forbod mot å ta cruiseskip til hamn, er passasjerane framleis om bord.
The Guardian skriv at forbodet gjeld heilt fram til september, noko som får store konsekvensar for cruisetrafikken i området.
Avisa opplyser at Hurtigruten forhandlar med chilenske styresmakter, lokale styresmakter, ambassader og andre for å få sett passasjerane på land og sende heim så raskt som mogleg.

Godt humør

Talspersonar for Hurtigruten seier at det ikkje er koronavirus om bord, og at gjestane er i godt humør.
The Guardian skriv at det er ei rekkje andre cruiseskip som har same problema som Roald Amundsen.

Stoppa i Karibien

Eit anna norskeigd cruiseskip, Braemar, er no på veg frå Bahamas til Cuba med passasjerar etter at dette skipet ikkje fekk gå til hamn nokon stad i Karibien etter at det er påvist korona om bord.
Passasjerane på Braemar får truleg gå i land på Cuba etter at skipet har vorte nekta å leggje til kai fleire stader i Karibien.
Dette cruiseskipet er eigd av Fred. Olsen Cruise Lines.
Om bord skal det vere 22 passasjerar og 21 av mannskapet i isolasjon etter at dei har utvikla influensaliknande symptomar.