Fartøykvotar i snøkrabbefisket

NPK-NTB/NETTNO: Regjeringa har fastsett reguleringa av snøkrabbefangsten for 2025. 

For første gong blir fangsten regulert delvis også på fartøynivå. Det betyr at det blir delvis slutt på eit reindyrka såkalla olympisk fiske, der båtane fiskar det dei kan inntil den totale kvoten er fiska opp.

For fartøy med snøkrabbeløyve er det vedteke å tildele ein garantert fartøykvote på 250 tonn innanfor ein maksimalkvote på 650 tonn i 2025, og fangsten kan starte opp 1. januar, heiter det i ei pressemelding frå Fiskeridepartementet.

Meir ro på feltet
– Dette er første gong vi skal regulere snøkrabbefangsten på fartøynivå, og eg ønskjer å leggje opp til ei regulering av fangsten i 2025 som gir aktørane meir ro på feltet og høve til å planleggje fangsten, seier fiskeri- og havminister Marianne Sivertsen Næss (Ap).

Nærings- og fiskeridepartementet har tidlegare fastsett ein totalkvote på 12.725 tonn snøkrabbe for fangst på norsk kontinentalsokkel i 2025. Det vart fangsta 706 tonn over totalkvoten i 2024 og dette blir trekt frå totalkvoten i 2025, som då altså blir 12.019 tonn.

Av totalkvoten skal 361 tonn bli gitt til forsking på snøkrabbe, medan 10 prosent skal avsetjast til ei ordning for levering av levande snøkrabbe.

Fredingsperiode er også neste år mellom 1. juli og 30. november.