Feira besøkande nummer éin million

Fredag markerte Loen Skylift ein milepåle då dei tok i mot reisande nummer éin million gjennom portane på gondolbana i Loen.

Jenny Løvdal Stauri frå Stryn vart den som stod for det historiske besøket.

For det blei ho belønna med eit æresbevis, fanfare og ei gåveboks som mellom anna inneheldt eit årskort på gondolbana.

Har knust forventingane
Dagleg leiar Richard Grov er overvelda over responsen reiselivsattraksjonen har opplevd sidan opninga i 2017.

– Dette er eit resultat av eit fantastisk team som jobbar hardt kvar dag for å gje våre gjestar ei uforgløymeleg oppleving, uttaler han i ei melding frå Loen Skylift om hendinga.

Før Loen Skylift opna var det knytt spenning til om den ville klare å nå besøksmålet på 65.000 årleg. Med ein million besøkande på sju og ein halv sesong, er dei no oppe i eit årleg snittbesøk på kring det doble.

Har tent gode pengar
Også økonomisk har satsinga vore ein suksess og heilt sidan bana opna portane til toppen av Hoven-fjellet, har pilane berre peika ein veg – rett opp.

2023 vart eit nytt kanonår og inntektene gjorde ei hopp til nær 80 millionar kroner. Samtidig blei overskotet dobla frå året før.