Fiskebåt styrkar seg

– Vi jobbar med svært mange forskjellige problemstillingar, og er avhengig av å ha medarbeidarar som kan hjelpe medlemmane når dei treng det.
Det seier adm.dir. i Fiskebåt Audun Maråk, i ei pressemelding etter at interesseorgansisasjonen har tilsett Kay Ove Hafsaas og Hanna Bauge i nye stillingar.
Hafsaas er utdanna siviløkonom, og har bakgrunn frå bank- og finansnæring. I Fiskebåt skal han blant anna jobbe med rammevilkåra for fiskeflåten, ringverknader, strukturpolitikk og pelagisk sektor.

- Viktig med nye unge medarbeidarar

Hanna Bauge er utdanna jurist, og har bakgrunn frå Fiskeridirektoratet og som advokatfullmektig hos advokatselskapet Øverbø Gjørtz i Ålesund.
Ho skal blant anna ha ansvaret for arbeidsrettslege forhold, arbeide inn mot Sjøfartsdirektoratet, høyringsarbeid, og jobbe opp mot styresmaktene i samband med juridiske problemstillingar knytt til fiskerilovgivinga. Ho skal i tillegg jobbe tett opp mot saksbehandlinga i Fiskebåt Vest.
- Vi har no fått på plass to dyktige og topp motiverte medarbeidarar i Fiskebåt. Begge har nyttig erfaring og kunnskap som vil kome Fiskebåt sine medlemmar til gode.
- Det er viktig å rekruttere nye unge medarbeidarar inn i næringa, noko heile næringa vil ha stor nytte av i åra som kjem, seier Maråk, i pressemeldinga.