(NPK-Peder Skjelten) Noreg har vedteke å redusere utsleppa frå innanriks sjøfart og fiske med 50 prosent innan 2030. Sjøfartsdirektør Lars Alvestad meiner omstillingsfarta i grøn flåtefornying må aukast kraftig om målet skal bli nådd.
To av tre nybygg i ordreboka til Sjøfartsdirektoratet er i dag konvensjonelle skip som skal operere på fossilt drivstoff, skriv direktoratet i ei pressemelding.
– I dag har vi for lite pådrag i framdrifta, vi må opp mange omdreiingar for å nå målet, seier Sjøfartsdirektør Lars Alvestad i pressemeldinga.
Treng 138 miljøskip årleg
Ifølgje Alvestad har Noreg fått 138 nye batteridrivne fartøy dei siste åtte åra. For å nå 2030-målet med ein kombinasjon av null- og lavutsleppsskip, må det bli bygd minst 138 nye lav- og nullutsleppsskip kvart år dei neste åtte åra.
Alvestad meiner Sjøfartsdirektoratet må stille strengare krav når omstillingsfarten er låg.
– Vi kan ikkje sitte og sjå på at det blir bygd skip som ikkje tek inn over seg det nødvendige grøne skiftet.
Publisert: 16.11.2021 15:35
Sist oppdatert: 16.11.2021 15:42
