Nyleg blei det kjent at Ålesund kommune vurderer å selje Dronning Sonjas Plass i sentrum av jugendbyen.

Formannskapet ga tysdag grønt lys for å legge ut tomta for sal, men har sett ei rekke vilkår, ifølgje Sunnmørsposten.

I møtet kom det også fram at den private aktøren som har meldt seg, er ålesundaren Knut Flakk.

(sjå lenke til vedtaket i kommune-tv under)

Flakk stadfestar interessa for tomta til NETT NO og fortel at utgangspunktet er at Flakk-konsernet ønsker seg eit nytt hovudkontor.

– I dag er konsernet spreidd litt ulike plassar i byen og vi vil gjerne samle oss i eit hovudkontor. På bakkeplan vil det vere publikumsretta verksemd, og det kan vere alt frå kafé, restaurant, mathall – eller heilt andre ting, fortel Flakk til NETT NO.

Skal leggast vekt på byutvikling
Sal av Dronning Sonjas Plass blir sett i samanheng med den planlagde utviklinga av sørsida. Det vil mellom anna bli lagt vekt på at tomta skal integrerast med ein parkdel på sørsida av Brosundet.

– Vi reknar med at det kan melde seg andre interessentar, men vi håpar sjølvsagt at det er oss som får tilslaget, legg Flakk til.

I saksutgreiinga blir det påpeika at eit eventuelt sal skal skje gjennom «transparente prosessar i den opne marknaden til høgstbydande som har det beste designkonseptet for utvikling av byrommet».

Har lokalar fleire stader i byen
Allereie i dag held Flakk-selskapet 62 Grader Nord til på staden, som mellom anna driv med sal av båtturar frå kaia. Konsernet har i dag hovudkontor tvers over vegen i Korsegata og har også lokalar ved Skansekaia.

Konsernet er involvert i alt frå produksjon av gass- og drivstofftankar i Hexagon Composites, via glassfasader i H-Produkter, ullkle frå Devold og eigedom.

Sjå behandlinga i formannskapet via Ålesund kommune sine heimesider (ekstern lenke)

Les også: Neste generasjon Flakk tek over

Festdag på børsen for Hexagon Purus-aksjonærar

Knut Flakk: – Verden sier faktisk «Look to Norway»