Får 20-årskontrakt med Kongsberg Maritime

Den nye leigeavtalen blir ei forlenging av den gjeldande 15 år lange avtalen, som går ut neste år.

Kongsberg sikrar seg både meir plass til fleire tilsette, og også sjansen til å leige ytterlegare meir plass dersom veksten blir enda større enn Kongsberg Maritime per i dag ventar framover.

Kvart milliard
Frontfigur og medeigar Kaj Bang Westre i NMK seier selskapet investerer omlag 250 millionar kroner i utviding og ombygging av NMK-bygget.

Storparten av den investeringa er knytt til å gi Kongsberg Maritime meir plass og betre lokale. Mellom anna skal det byggast innebygde bruer i sjette etasje mellom dei tre fløyane NMK-bygget består av i dag. 

Raskare vekst
Kongsberg Gruppen er den største leigetakaren på NMK i dag og avtalen gjer at NMK kan sette fart på planane om ytterlegare vekst, ifølgje Westre. Utan Kongsberg som leigetakar måtte han i første omgang ha konsentrert seg om å fylle lokala med andre leigetakarar. I tillegg er Kongsberg også eit trekkplaster for bygget.

– Det blir ein heilt annan dimensjon med Kongsberg med på laget. Det vil også gjere at vi får meir fart på å kunne ta ytterlegare byggetrinn her seinare, seier Westre.

Plass til 400
Per i dag er det 368 Kongsberg-tilsette med arbeidsstad på NMK.

Etter ombygginga får Kongsberg Maritime 400 kontorarbeidsplassar på NMK. 

I og med at ein del av dei tilsette er på reise, arbeider på heimekontor eller av andre årsaker ikkje er til stades på kontoret betyr dei større lokala at det er rom for mellom 450 og 500 arbeidsplassar etter utvidinga.

Nærleik til maritim klynge og NTNU
Johnny Aarseth er leiar for divisjonen automasjon, energi og integrerte system i Kongsberg Maritime og er den einaste i leiargruppa til Kongsberg Maritime med adresse på Nordvestlandet. Kongsberg Maritime er eit datterselskap i Kongsberg Gruppen. 

I dag var Aarseth med og presentere grunngiving, planane og målane Kongsberg Maritime har for satsinga i Ålesund feemover.

Også nybygg blei vurdert seier Aarseth.

– Vi valde å vere her, for det er det vi meiner gagnar oss best i forhold til å vere tett på andre aktørar i klynga, og ikkje minst nærleiken til NTNU og akademia, seier Aarseth.