Gjennombrot for Roadtech

Roadtech gjekk til topps i Næringsteftkonkurransen 2018/2019 med sin ide om å automatisere utsetting og henting av brøytestikker. No har Tingvoll-selskapet inngått ein avtale med Svevia Norge om å levere utstyr som skal brukast i Trøndelag.

- Forløysande, seier grunnleggar Peder Strømsvåg om kva avtalen betyr for selskapet.

Doblar kapasiteten

Roadtech har det siste året samarbeidd med Sykkylven-selskapet Amatec om å vidareutvikle den opphavlege ideen, ei maskin som kan sette ut og hente inn brøtestikker medan lastebilen maskina står på er i fart.
Det sparer tid, og doblar kapasiteten samanlikna med tradisjoneller metodar, ifølgje Strømsvåg.
Avtalen med Svevia Norge omfatter ei slik stikkemaskin og 50.000 av Roadtech sine spesialutvikla brøytestikker.

Dramatisk for selskapet

Roadtech fekk ikkje innpass i marknaden så raskt som selskapet hadde venta, og Strømsvåg skildrar situasjonen for selskapet som «veldig dramatisk for oss ei periode».
Målet var å levere tre maskiner i år. No blir det ei, og ytterlegare tre neste år.
Ein viktig grunn til forseinkinga, etter Strømsvåg si vurdering, er omorganiseringa av Statens Vegvesen der deler av dei tilsette er blitt flytta over til fylka. Den omorganiseringa har gjort at arbeid og oppdrag er blitt sett på vent.