Gjennombrot for nytt skipsdesignselskap

Sirius Design & Integration i Ålesund vart etablert av tidlegare Optimarsjef Håvard Sætre i 2021 og har mellom andre Erik Haakonsholm som medeigar.

No har selskapet fått jobben med å designe to containerskip som skal frakte trykksett hydrogen frå produksjonsanlegget i Mosjøen og kundar i Europa.

Det er selskapet Gen2 Energy som har bestilt skipa. Kva verft som skal byggje fartøya er ikkje avklart.

Gjennombrot
- Denne avtalen er eit definitivt gjennombrot for oss, og viser at vi har fått med oss dei beste av dei beste, seier administrerande direktør Håvard Sætre i ei pressemelding.

Dei to skipa skal vere om lag 190 meter lange, med ein lastekapasitet på 500 40-fots containarar. Skipa skal byggast for å kunne gå på drivstoff som gjer at dei blir rekna som utsleppsfrie. Kva drivstoff er ikkje avklart.

Gen2 Energy skal bygge eit anlegg for hydrogenproduksjon i Mosjøen, og planlegg også fleire anlegg i Noreg, i følgje pressemeldinga.

Henta inn pengar
Tidlegare i mars henta Gen2 Energy inn 150 millionar kroner i ny eigenkapital, der blant andre dei britiske fonda HyCap Fund og HydrogenOne Capital Growth kom inn på eigarsida, ifølgje Finansavisen. Kapitalutvidinga verdsette Gen2 Energy til 600 millionar kroner.

Største aksjonær før kapitalutviding var selskapet KB Management, med 19,11 prosent av aksjane i følgje nettsida til Gen2 Energy. KB Management er eigd av Kjetil Bøhn, som mellom anna er tidlegare leiar for Quantafuel.