Har bygt nytt kjøken til sju millionar

- Det gamle kjøkenet var for lengst klart for utskifting. Dei som arbeider der vil få ein heilt annan kvardag, seier Briksdal.
Sju millionar kroner har det 150 kvadratmeter nye kjøkenet kosta.
- Drifta går rimeleg greit, slik at no var eg klar til å satse.
Per Briksdal er eineeigar av selskapet Briksdalsbre Fjellstove, medan broren Frode står bak Olden Adventure, og bidreg til å få turistar og andre reisande fram i Briksdalen.

- Mykje anna enn breen

Årets sesong starta i april og varer til månadsskiftet oktober/november.
Per Briksdal er godt nøgd med tilstrøyminga, sjølv om Briksdalsbreen minkar.
- Av og til minkar breen, av og til veks han. I det siste har han minka, seier Briksdal.
Han seier at det slett ikkje er berre breen som trekkjer turistane fram i Briksdalen.
- Du har Olden og sjøen, du har grønkledde dalar, du har Oldevatnet og imponerande fossar, og du har ein spektakulær veg fram i Briksdalen. Og til slutt har du breen.

Godt resultat

I fjor omsette Briksdalsbre Fjellstove for 24,8 millionar kroner. Resultatet før skatt vart 3,3 millionar, og Per Briksdal kunne ta seg ut eit utbyte på 2,7 millionar kroner.
- Det ser også bra ut for i år, seier han.
I tillegg til å kunne ta imot og servere opptil 550 gjester, er det ved fjellstova også seks doble rom, i tillegg til leilegheit og ei hytte.
Per Briksdal seier at det er ikkje aktuelt å auke denne delen.
- Nei, no satsar vi endå meir på serveringsdelen.

Jaktar kokkar

Totalt er det 12 årsverk knytte til bedrifta.
- I toppsesongen er her mange fleire.
- I og med her er mange turistar frå mange ulike land, satsar vi også på å ha tilsette med ulik språkkunnskap.
Han seier at det går greit å få tilsette til å arbeide i Briksdalen.
- Unntaket er kokkar. Her slit vi litt, seier Per Briksdal.