Har meir enn dobla inntektene på tre år

Rekneskapen til Aalesund Seafood-konsernet viser ny rekordomsetning og overskot i fjor. Omsetninga enda på 532 millionar kroner og resultat før skatt vart knappe 10 millionar (sjå tabell under).

Aalesund Seafood driv med sal av fisk og sjømat både til det norske marknaden og for eksport.

Inntektene har auka kraftig sidan 2020, då selskapet omsette for drygt 230 millionar. Overskotet er også det høgaste dei har hatt siste ti åra.

Nytt overskott for Brødr. Aarseth
Ålesund-konsernet eig også 100 prosent av klippfiskprodusenten Brødr. Aarseth på Ellingsøya, som omsette for 225 millionar kroner i 2023.

Det er også ny rekord og litt opp frå året før. Inntektene steig med nær 100 millionar kroner frå 2021 til 2022.

I fjor fekk selskapet samtidig eit nytt overskott, etter å ha streva med minustal i åra 2016-2021.

Meir enn 50 år i bransjen
Mesteparten av eksporten frå Aalesund Seafood går til Kina, England, Portugal og Spania, og dei viktigaste produkta er frossen kvitfisk og klippfisk.

Selskapet har røter tilbake til 1971, då selskapet dreiv med kjøp og sal av båtar. Men etter kvart bygde selskapet seg opp som eit fiskeriselskap med kjøp og sal av fisk, i tillegg til å eige båtar sjølv.

Aalesund Seafood er eigd 50 prosent av portugisiske Cashide & Roaldao S.A. Grupomar og 50 prosent av Aalesund Shipping Group - med mellom anna Bjørn Kåre Eikrem og Kåre Eikrem på eigarsida.