Havila Holding-betaling klar

Lånet forfell til betaling først i 2017, men Havila Holding betalar attende no etter at selskapet ikkje oppfyller lånevilkåra.
Varselet er sendt ut på Stamdata, som publiserer meldingar om obligasjonsmarknaden.

Utløyst av Havila Shipping

Havila Holding er Sævik-familiens holdingselskap, og eig mellom anna 51 prosent i det børsnoterte offshorereiarlaget Havila Shipping, som er i forhandlingar med kreditorane om ei refinansiering av reiarlaget.

Eitt av lånevilkåra i Havila Holding sitt obligasjonslån er knytt til tilstanden i Havila Shipping, og mandag kveld varsla ei gruppe av eigarane av obligasjonslånet at dei meiner Havila Holding bryt lånevilkåra.

Såg det kome

Per Sævik, som er dagleg leiar og medeigar i Havila Holding saman med barna, sa til NETT NO tysdag 15. mars at selskapet hadde sett at det ville kome i brot med lånevilkåra på grunn av Havila Shipping, og ville løyse problemet med å nytte retten til å betale attende lånet før tida.

Lånet skulle betalast attende i løpet av kort tid, sa Sævik, og i dag kom altså melding om at det skal skje innan 30 dagar.

Garanterer for emisjon

I samband med refinansieringa av Havila Shipping tilbaud Havila Holding seg å gå inn med 153 millionar kroner i ny eigenkapital i reiarlaget. Det var tilbodet i det siste framlegget, som vart avvist fordi det ikkje fekk tilstrekkeleg fleirtal i eitt av dei fire obligasjonslåna som Havila Shipping sit med.
- Vi har framleis handlingsrom i Havila Holding når vi nedbetaler obligasjonen, seier viseadministrerande direktør Vegard Sævik i Havila Holding.
Per Særvik sa til NETT NO at selskapet har seld "ein del assets". Eitt sal er fiskebåten Artus. Vegard Sævik vil ikkje opplyse om kva andre eigedelar som er seld.
Havila Holding eig 33,3 % av Bakkar og Berg Media, som står bak NETT NO.