- Det er i praksis ikkje i bruk, seier den erfarne bustyraren Thore Heggen om bruken av gjeldsforhandlingar i dag.
Heggen var bustyrar både for konkursen i krillselskapet Emerald Fisheries, fiskesal-selskapa Sunsea og Sunsea Seafood og er bustyrar i simulatorselskapet Fosnavåg Ocean Academy.
Før Emerald Fisheries gjekk konkurs var Heggen leiar for gjeldsforhandlingane i selskapet. Havyard-selskapet Havyard Ship Technology, er det andre selskapet Heggen kjem på som er under gjeldsforhandlingar.

Mellomløysing

Heggen meiner framlegget frå regjeringa i dag, om endringar som skal gjere det lettare å få til gjeldsforhandlingar, er ein god ide.

- Eg meiner det er bra at du skal ha eit regelverk som fangar opp selskap mellom å vere fullt operative og den reine konkursen, seier han.

Krisetiltak

Reglane for gjeldsforhandlingar har vore under vurdering i fleire år, nettopp på grunn av at ordninga nesten ikkje er i bruk.
No har koronakrisa sett fart i arbeidet for ei endring, fordi regjeringa fryktar at ellers levedyktige bedrifter vil gå konkurs fordi regelverket gjer at gjeldsforhandlingar ikkje blir brukt.
Blant anna blir det råd å starte forhandlingar tidlegare enn i dag, medan bedriftene framleis har pengar igjen. Skattestyresmaktene sin førsterett til utbetalingar, for krav om skatt og meirverdiavgift, kan også måtte vike etter dei nye reglane.
"Vi vil gjøre det enklere å redde bedrifter som nå er kommet i fare for å gå konkurs, og slik redde viktige arbeidsplasser. Derfor fremmer vi dette forslaget om å sikre mer effektive gjeldsforhandlingsregler", seier justis- og beredskapsminister Monica Mæland i ei pressemelding.

Varig endring

Framlegget til nye reglar er mellombelse, men Mæland skriv i pressemeldinga at endringane i stor grad "kan utvikle seg til permanente lovendringer".
Regjeringa vil også døype gjeldsforhandlingar om til rekonstruksjonsforhandlingar.
"Formålet med en ny terminologi er å understreke at det er tale om en nødvendig omlegging av virksomheten og måten den drives på, hvor en sanering av gjelden bare er en del av løsningen", heiter det i lovframlegget.