Hexagon med oppkjøpsavtale

Det austerrikske selskapet Cryoshelter utviklar tankar for å oppbevare flytande hydrogen og flytande naturgass.

No har Hexagon Purus avtalt å kjøpe 40 prosent av hydrogen-tankverksemda til Cryoshelter for 3,5 millionar Euro, 33 millionar kroner. Samstundes har Hexagon Composites avtalt å kjøpe 40 prosent av naturgass-tankverksemda for 2,5 millionar Euro, 24 millionar kroner. Avtalen verdset hydrogen- og naturgassverksemdene til Cryoshelter til 144 millionar kroner.

Kan overta alt
Som ein del av avtalen blir hydrogen- og naturgassverksemdene til Cryoshelter skilt ut i eigne selskap.

Begge Hexagon-selskapa har rett til å kjøpe seg opp til 100 prosent eigarskap, Hexagon Composites innen tre til ti år, Hexagon Purus innan fem til ti år.

Blir alle vilkår oppfylt skal kjøpet gjennomførast i tredje kvartal i år.

Les børsmelding frå Hexagon Purus her

Les børsmelding frå Hexagon Composites her

Hexagon Composites har Flakk-familien i Ålesund som nest største eigar, og Knut Flakk er styreleiar. Hexagon Composites eig 73,3 prosent av aksjane i Hexagon Purus. Begge selskapa er børsnotert, med hovudkontor i Ålesund.

Utvidar marknaden
Hexagon Composites og Hexagon Purus lagar drivstofftankar og -system for bruk av naturgass og hydrogen i gassform.

Cryoshelter har utvikla tankar for naturgass i flytande form, og utviklar tilsvarande tankar for hydrogen.

Gass i flytande form har meir energi i høve til volum enn i gass under trykk, som er ein fordel under transport.

Medan gass under trykk er det dominerande alternativet for lastebilmarknaden i Nord-Amerika er gass i flytande form dominerande i Europa og Hexagon Composites ventar aukande vekst i denne marknaden, i følgje børsmeldinga.

Teknologi-utvikling
For tankar for flytande hydrogen er det framleis utviklingsarbeid å gjere, og utviklingsarbeidet skal skje i eit samarbeid mellom Cryoshelter og Hexagon Purus, ifølgje børsmeldinga.

"Cryoshelter sin teknologi for tankar for flytande hydrogen er i ei tidleg utviklingsfase", heiter det i meldinga.