Hyttebyggar konkurs med stor gjeld

Møre og Romsdal tingrett har opna konkurs i Stranda Fjellgrend etter at leiinga har meldt oppbod.

Selskapet har vore mellom dei største utbyggjarane av hytter på Strandafjellet og vart etablert i 2012.

Retten fekk opplyst at den samla gjelda er på 36 millionar kroner og verdiane er på kring 24 millionar. Verksemda er no innstilt og det er ingen tilsette i selskapet, ifølgje rettspapira.

Bustyrar i saka er Cathrin Myre Skram og første skiftesamling er planlagt 21. oktober. Ho fortel til Nett No at ho skal ha eit møte med leiinga over helga, og vil få meir informasjon om årsaka til konkursen då.

For nokre år sidan selte selskapet hytter for meir enn 40 millionar kroner årleg. Dei siste åra har det vore betydeleg mindre aktivitet.

Ifølgje det siste offentlege rekneskapen frå 2022 hadde firmaet ei omsetning på knapt ein halv millionar og eit underskot på kring halvannan million. Eigenkapitalen var på kring 2,6 millionar ved utløpet av det året og den samla gjelda på 14,4 millionar.

Det er Jan Arvid Berge, Vidar Mork og Frode Mork som har vore eigarar av selskapet med ein tredjedel kvar.

Nett No har ikkje kome i kontakt med selskapet for å stille spørsmål om årsaka til konkursen.