Hytteforbodet: Vil gi råd - helst ikkje straff

- Landet vårt er i ein svært alvorleg situasjon, og påska står for døra. Vi nordmenn har ei sterk dragning mot hytteliv og ski når påska kjem, men i år må vi ofre dette i den nasjonale dugnaden for å handtere koronapandemien. Mykje tyder på at dei omfattande tiltaka styremaktene har sett i verk, verkeleg har hatt effekt, men vi er ikkje i mål enno.
Det seier politimeister Ingar Bøen i Møre og Romsdal politidistrikt i ei pressemelding tysdag. Bøen har sjølv hytte i ein annan kommune enn det han bur, og er dermed omfatta av hytteforbodet under koronakrisa.

Skal halde seg der ein bur

Politiet viser til at intensjonen bak forbodet er at alle skal halde seg heime der dei bur, slik at ein avgrenser belastninga på det lokale hjelpeapparatet i hyttekommunen - som skal handtere koronapandemien.
- Vi opplever at folk i stor grad etterlever hytteforbodet og det er bra. Men vi må halde fram med det, vi er ikkje i mål enno, seier Bøen.

- Ikkje berre ei privatsak

Han opplyser at Politiet har så langt lagt vekt på å nærme seg situasjonen gjennom førebygging, råd og rettleiing, men understrekar samstundes at det ikkje må vere tvil om at openberre brot på smittevernlova vil bli tatt på stort alvor.
- Vi opplever likevel at folk i stor grad respekterer karantenereglane og det er bra. Men vi kan ikkje slappe av enno. Vi treng denne nasjonale dugnaden for å handtere ein alvorlig pandemi i Norge.
- Dette er ikkje berre ei privatsak, men eit samfunnsansvar alle må ta i fellesskap, seier Bøen.

- Velg andre turmål

Han viser til at dersom folk rettar seg etter smitteverntiltaka, vil den enkelte samtidig bidra til at politiet kan bruke mest mogleg av sine ressursar på å førebygge og bekjempe alvorleg kriminalitet.
- Det inneber mellom anna at du heller ikkje må la deg friste til å oppsøke dei mest populære utfartsstadane om turveret skulle bli godt i den stille veka.
- Start turen heimanfrå og velg deg turmål som du ikkje har hatt før. Det er nemleg svært viktig å hindre smittespreiinga og at vi også framover passar på å halde avstand til andre enn dei som høyrer til husstanden din, seier Bøen.