Hyttetomtene går unna på Stranda

Dei utflytta strandarane Martin og Ingunn Vollen satsar stort på tomteutvikling på Strandafjellet. Dei har gjennom selskapet Mivo i Ålesund gjennomført fleire reguleringsplaner med i overkant av 100 byggeklare hyttetomter på Strandafjellet sidan 2012.
No er rundt 50 tomter seld, og særleg i år har det vore svært godt sal.
- No er det full fart på Strandafjellet, vi har i dei sju første månadane i år inngått fleire avtalar om tomtesal enn vi normalt gjer på eitt år. Når det også er hausten som er høgsesong på sal, reknar vi med eit godt sal utover resten av året også, seier Martin Vollen.

Auka aktivitet bidreg til meir aktivitet

Ifølgje Vollen er det fleire forhold som bidreg til godt sal.
- Det er mykje aktivitet på Strandafjellet, som har hatt ei god utvikling seinare åra. I år har det vore ei tredobling av antal cruisepassasjerar som tok gondolheisa i forhold til i fjor, og aktivitet skapar meir aktivitet. Når skiheisene og gondolbana også er ope kvar dag i vinter- og sommarsesongen, blir det også sett meir på som eit heilårsområde enn tidlegare.
Også utanlandske kjøparar viser interesse for hyttetomter der.
- Vi har allereie selt ei tomt til ein utanlandsk kunde og er i dialog med fleire andre også. Det er kjempespennande. At Land Rover la verdslanseringa av ein ny Range Rover-modell til Sunnmøre og inviterte mange hundre journalistar blant anna til Strandafjellet, gir også fantastisk sunnmørsreklame som vi kjem til å sjå igjen i internasjonal presse i lang tid framover.

Lite utleigekapasitet

Eit anna forhold som bidreg til tomtesal, er at det er vesentleg større rift om utleigesengar enn det er utleigekapasitet.
- Det er eit sug etter utleigekapasitet og der det ikkje er ei ledig seng å oppdrive lenger. Det bidrar også til auka interesse for tomtekjøp, og mange hyttebyggarar seier at dei også vil leige ut hytta, noko som også kan bidra til å finansiere investeringa, seier han.
Mivo vil no også byrje å setje opp nøkkelferdige bygg og samarbeider med fleire rundt dette. Det er mange potensielle tomtekjøparar som ikkje ønsker arbeidet med ein byggjeprosess.

Planlegg leilegheitsprosjekt med bygging neste år

No vil dei også byggje leilegheiter for sal.
- Vi held på med å planlegge eit prosjekt på 20-30 leilegheiter for sal og med oppstart bygging neste år, seier Vollen.
Han bekymrar seg ikkje for at det ikkje er nok kjøparar til tomtene og leilegheitene.
- Men vi må passe på å planlegge utbyggingane slik at det skjer i takt med etterspørsel og sal, og dette er ei krevande øving.
Største antalet kundar kjem frå Ålesund-området, og ifølgje Vollen er det mange som legg vekt på å ikkje ha for lang reiseavstand når dei gjer val om kvar dei skal ha hytte.

Opptatt av å tenke heilheit i tomteutviklinga

Mivo har leigd inn eit stort nettverk med faglege ressursar i reguleringsarbeidet som dei har gjort, blant anna arealplanleggarar.
- Vi er opptatt av å tenke heilheit, særleg med omsyn til infrastruktur, og eg ivrar for at det bør være ein masterplan når ein regulerer og bygg ut. Hvis ikkje blir det tomteutbygging som eit lappeteppe, sa Martin Vollen til NETT NO i fjor.
Les også:
Det er hovudsakleg i dei to felta Ringstadsetra Hyttegrend og Andersgrenda - og no også i det nye feltet Ottogrenda - på Roaldsida at tomtene ligg. Tomtene er rundt 1 mål, og prisane ligg frå 790.000 kroner og oppover, inkludert tekniske anlegg.
- Vi jobbar også parallelt med nye reguleringsplanar etter kvart som vi bygg ut infrastrukturen, seier han.