Island Offshore sel tre nybygg

Plattformforsyningskipa "Island Defender" og "Island Discoverer" skal få nye eigararar. Det same skal "Island Diligence" som er under ombygging til innkvarteringsfarty. Skipa er i dag under bygging hos Vard.
Salet er ein del av framlegget til refinansiering av Island Offshore, som er lagt fram i dag.

Utset gjeldsbetaling

Dagens Næringsliv skreiv i førre veke at Island Offshore langt på veg var i mål med eit framlegg til refinansiering av selskapet, som mellom anna inneber at attendebetaling av gjeld til bankar og obligasjonseigarar på 7,8 milliardar kroner blir utsett til hausten 2018.
Selskapet stadfesta like etter at det var semje om ein avtale, som også vil innebere at eigarane skyt inn 100 millionar kroner i ny eigenkapital.
Les meir: og
I dag kom meldinga om detaljane i framlegget, saman med ei innkalling til obligasjonseigarmøte 16. mars, der obligasjonseigarane skal ta stilling til framlegget. Selskapet har eit obligasjonslån på 700 millionar som forfell til betaling i april. I dagens marknad kan Island Offshore ikkje betale som avtalt.

Jobbar med sal

Administrerande direktør Håvard Ulstein seier det blir arbeidd med eit sal, men han kan i dag ikkje kommentere kva som er status i prosessen eller om skipa eventuelt skal leigast attende av Island Offshore.
Dei tre skip skal eigast og finansierast utanfor selskapet, i følgje børsmeldinga.
Også to andre farty er omfatta av refinansieringsplanen. Levering av offshorefartyet "Island Victory" er utsett, og selskapet har forhandla fram nye vilkår i avtalen med japansek Kawasaki Heavy Industries som skal levere skipet "Island Navigator".

2,7 milliardar

Både Island Victory og Island Navigator er kostbare farty.
Island Victory er eit installasjonsfarty som blir bygd hos Vard Brevik, med ein prislapp på over ein milliard kroner og opphavleg levering i juni 2016.

Island Navigator er eit kombinert brønnintervensjons- og toppholsboringsfartøy med utstyr og kapasitet til å utføre ei rekkje kompliserte subsea- og brønnoperasjonar, med ein opphavleg prislapp på 1,7 milliardar kroner med levering i 2018/2019.

Store finansielle utfordringar

Island Offshore ser alvorlege finansielle utfordringa i åra 2016-2019. Selskapet kan korkje betale lån som forfell til betaling i den næraste framtid, og har ikkje store nok inntekter til å betale avtalte renter og avdrag på mellomlang sikt heller. i følgje børsmeldinga.
Som ein dei av refinansieringa tilbyr selskapet seg og å kjøpe attende deler av obligasjonslånet på 700 millionar kroner. Obligasjonseigarane får tilbod om å selje til 72,5 prosent av pålydande, avgrensa opp til 230 milionar kroner. Framlegget er basert på samtaler med eigarane av 40 prosent av obligasjonslånet, heiter det i børsmeldinga.
Ein av obligasjonseigarane som truleg støttar framlegget er Trond Mohn, bergensmilliardæren som kjøpte 19 prosent av lånet på veslejulaftan i fjor og erklærte at det var ei vennlegsinna investering.

Tøft kvartal

I følgje reknskapen for Island Offshore for heile 2015 og 4. kvartal 2015 tok selskapet nedskrivingar på 268 millionar kroner i fjerde kvartal. Det forverrar resultatet (sjå tabell), men Island Offshore hadde gått i minus også utan nedskrivingane.