Kan tene på utsett torskefiske

Samanlikna med 1. kvartal i fjor fall prisen på torsk, hyse og sei i 1. kvartal i år med høvesvis 27 prosent, 14 prosent og 9 prosent.

Det er hovudårsaka til at forretningsområdet villfisk i Lerøy Seafood Group hadde nedgang både i driftsinntekter og driftsresultat (sjå tabell) i 1. kvartal i år samanlikna med 1. kvartal i fjor. Torsk er det økonomisk viktigaste fiskeslaget for reiarlaget.

Forretningområdet villfisk omfattar fiskebåtreiarlaget Lerøy Havfisk, med hovudkontor i Ålesund og ti trålarar. Lerøy Havfisk eig og fem fiskeindustrianlegg. Dei blir leigd ut til søsterselskapet Lerøy Norway Seafoods, som i tillegg har ytterlegare sju anlegg for mottak og/eller foredling av fisk.

Les børsmelding her

Meir hyse, mindre torsk
Lerøy Havfisk prioriterte fiske etter hyse føre torskefisket i 1. kvartal i år. Det gjorde at andelen torsk av fangsten blei redusert frå 50 prosent i 1. kvartal 2020 til 43 prosent i 1. kvartal 2021.

Lerøy Havfiske har over halvparten av torskekvoten sin att å fiske, og understrekar sjølv i kvartalsrapporten at ein relativt større andel av torskekvoten skal fiskast seinare i år enn i fjor.

Grunnen til at det kan vere ein fordel er at det er venta prisstigning, spesielt på torsk, etterkvart som det blir lette i koronatiltaka framover - og dermed meir fart i restaurant-, catering- og hotellmarknaden, som er viktig for torskefisket.

I fjor var det ein fordel å fiske meir torsk tidleg, fordi mykje blei seld før prisfallet koronaepidemien førte til.

Vurderer oppdrett på land
Det er fiskeriverksemda til Lerøy Seafood-konsernet som har størst direkte betydning på Nordvestlandet, men oppdrettsverksemda er den klart størst verksemda til konsernet.

No vurdere Lerøy Seafood Group å satse på oppdrett på land, heilt fram til slakteklar fisk. Selskapet har kjøpt eit industriområde "i Vestland fylke" til formålet i følgje kvartalsrapporten.

I første omgang er det snakk om å utvide tida fisken er i landanlegg før den er i sjøen, men det kan og bli eit anlegg som kan produsere slakteklar fisk.

Lukkast satsinga kan erfaringane "potensielt nyttes til realisering av landbaserte prosjekt i andre regioner", heiter det i kvartalsrapporten.