Kapra meir jobb i vassmarknaden

Dei siste vekene har Entec-konsernet sikra seg fleire nye oppdrag innan vassbehandling. Verdien på kontraktane summerer seg til nær 20 millionar kroner.
- Det er gledeleg å sjå av vi lukkast i ein strategisk viktig marknadssegment for oss, uttalar konsernsjef Håvard Haanes i ei pressemelding.
Fleire av leveransane er inngått av Entec-selskapet Servitech – som nyleg blei fusjonert med Brimer-selskapet i same konsern. Frå lokalitetane på høvesvis Sjøholt og Kvamsøya har desse selskapa allereie samarbeida om oppdrag i fleire år.

Høgdebasseng i Rendalen

Eitt av prosjekta er eit høgdebasseng frå Brimer på 13,5 meter i diameter og 6 meters høgde. Bassenget er laga i polyester armert med glasfiber, eit materiale som blir føretrekt fordi det er tett, glatt og enkelt å halde ved like.
Det er Lysinga Vannvek i Rendalen i Østerdalen som har bestilt anlegget. Arbeidet ute på byggeplassen startar etter planen opp i mai 2021, og skal ferdigstillast i løpet av hausten.
I leveransen inngår også anlegg for behandling av vatnet med UV-aggregat, røyrinstallasjonar og pumper. Fordi anlegget skal driftast også ved straumbrot, blir det utstyrt med dieselaggregat og UPS.

Vekst og betre lønnsemd

Pilene peiker oppover i fjor for Entec Group-selskapa. Fjoråret enda med gode resultat for både Evotec i Ulsteinvik og Brimer, medan Servitech enda 2019 med eit lite underskot.
Nyleg blei det kjent at dei to sistnemnte selskapa blir slått saman med Hareid-selskapet Utbyggingsteknikk, som blei kjøpt opp i fjor.
Den samla arbeidsstokken for selskapa har gått opp det siste året. Brimer og Servitech har no drygt 110 tilsette til saman. Evotec som også er med i Entec Group, har om lag 50 tilsette.