Klar for oppdrag i Skotland

Aas Mek. Verksted på Vestnes har overlevert brønnbåten Marsali til det skotske reiarlaget Migdale Transport Ltd.
Båten går no rett til Skotland på fast charter for Cooke Aquaculture sine oppdrettsaktivitetar i Skotland, opplyser Aas Mek. Verksted i ei pressemelding.

Første nybygget

Migdale er heimehøyrande ved Bonar Bridge i Skotland, der dei driv med smoltproduksjon, landtransport av levande fisk og brønnbåttenester.
Marsali er første nybygget til selskapet, som frå før har brønnbåten Migdale, tidlegare Rofisk, ein brønnbåt som også er bygt ved Vestnes-verftet.
Den nye brønnbåten er 62,8 meter lang, 12,0 meter brei, og har ein lasteromskapasitet på 1500 kubikkmeter fordelt på to rom med skyveskott.

Produserer ferskvatn

Aas Mek. Verksted opplyser at båten er utstyrt og arrangert spesielt for transport av smolt, samt føring av levande fisk i lukka system.
Båten er også utrusta med dewater laste/lossesystem for ferskvassbehandling av fisken. Nybygget er utstyrt med eige ferskvatn produksjonsanlegg med kapasitet på 3000 kubikkmeter per døgn.
Fartøyet er vidare arrangert for sortering, avlusing med filter for oppsamling av lus, og er spesielt konstruert for å kunne trykklosse med ei trykkhøgde på opptil 15 meter. Dette for å kunne trykklosse direkte til slakteri eller mottakstankar på land.
Marsali er innreidd for ti personar, der alle lugarar har eigne dusj og toalett.