Kraftig børsfall for Ekornes-kjøper

Frå midten av juni i år har har aksjekursen i Qumei Home Furnishing Group hatt ein nesten samanhengande nedtur. Verdien på selskapet er meir enn halvert sidan selskapet kom med bodet på Ekornes i mai.
Selskapet nådde ei botnnotering på torsdag, med 6,39 kinesiske yuan pr. aksje. I dag, fredag 26. oktober, var sluttnoteringa 6,59 yuan pr. aksje i følgje Bloomberg. Det verdset selskapet til cirka 3,8 milliardar kroner.

Betalte 5,1 milliardar

Qumei Home Furnishing Group betalte 5,1 milliardar kroner for å ta over Ekornes. All handel med Ekornesaksjar på Oslo Børs stoppa 19. september.
Sett på spissen kan du no kjøpe det kinesiske selskapet - med Ekornes på kjøpet - for mindre enn Qumei Home Furnishing Group betalte for Ekornes.

Dominerande eigar

Til skilnad frå Ekornes, der ingen aksjonær eigde meir enn 20 prosent av aksjane i selskapet, har Qumei Home Furnishing ei gruppering på tre aksjonærar som tilsaman sit med 72,9 prosent av aksjane i selskapet.
Ruhai Zhao er sjefen i selskapet og eig 33,15 prosent, Rubin Zhao eig 32,44 prosent og Riuijhe Zhao 7,28 prosent.