På førehand hadde handelsstanden på Nordfjordeid budd seg på at ein fjerdepart av cruiseturistane som kjem til bygda ville gå i land.
Dei forventningane blei gjort grundig til skamme under "Aida Perla" sitt besøk 21. mai. 3800 passasjerare var med skipet og alle var på land, enten for å dra på førehandstinga turar - frå Vestkapp i Vest til Geiranger og Loen/Briksdalsbreen i aust - eller berre for å rusle rundt i Eid sentrum.
Dagen etter kom det mindre cruisesskipet "Zenith", med 1250 passasjerar ombord. Nesten alle gjekk i land og 1000 av dei hadde tinga ein tur på land før skipet kom fram.
- Det gikk kjempegodt, seier Kjersti Brovold i Didriks Kafe & Gaver i handelgata i Eid om dei første cruiseanløpa til Eid. I dag kjem det tredje anløpet, og Brovold er travelt opptatt med å bu seg på innrykk av turistar.
- Det er gode dagar, seier ho om det økonomiske resultatet.

Pengar i kassa

860 kroner er anslaget for kor mykje ein cruiseturist legg att på land. I alt 58.000 passasjerar er venta til Nordfjordeid i den første cruisesesongen for kommunen. Om ein fjerdepart av desse går i land utgjer det ei inntekt på 12 millionar kroner til butikkar, restaurantar, busseselskap, museum og andre som tilbyr service og opplevingar til turistane.

Klarer Nordfjordeid å lokke like mange på land i resten av sesongen som bygda greidde ved dei to første cruiseskipsbesøka så er inntektspotensialet mellom tre- og fire gangar større.

58 prosent opp

Dagen då "Aida Perla" låg ved kai registrerte kjøpesentertet Amfi Nordfjord 6325 besøkande. Tilsvarande dag i fjor, som også var ein godt besøkt dag, var det 4008 registrerte besøkande i følgje senterleiar Gro Gjerdevik.
- Så langt har vi berre positive erfaringar, seier Ingvill Henden.
Ho eig og driv klesbutikken Vestitur på Nordfjordeid, er leiar for Eid Handel (foreininga for handelsbedriftene i kommunen) og sit også i prosjektgruppa som har planlagt korleis Eid skal ta i mot og få nytte av cruisetrafikken.