Lønsame koronaår

- Det er omstillingsevne i verdensklasse, seier dagleg leiar Aina Aalen Bjerkvik i Hotel Ålesund om handteringa av koronapandemien.

Ved årsskiftet gjekk ho frå leiarjobben i Quality Hotel Ålesund til leiarjobben i Quality Hotel Waterfront. Dei to hotellselskapa er ein del av Petter Stordalens hotellkonsern Strawberry Hospitality Group.

I tillegg til felles eigarskap hadde dei ei sammanfallande utvikling då koronapandemien kom.

Lønsemda gjekk opp.

Quality Hotel Waterfront hadde 0,7 millionar kroner i resultat før skatt i 2019. I 2022 og 2020 var resultatet før skatt høvesvis 9,8 og 10,5 millionar kroner.

Qality Hotel Ålesund hadde 1,3 millionar kroner i resultat før skatt i 2019, og fem millionar i resultat før skatt i både 2020 og 2021.

Karantenehotell
Waterfront hadde ein avtale om å vere karantenehotell for Giske kommune og vart i tillegg brukt som karantenehotell for skipsmannskap fortel Aalen Bjerkvik. Quality Hotel hadde ein avtale med Subsea 7 sin spolebase på Vigra. Begge deler gav inntekter til hotella som kompenserte for færre ordinære kundar.

I koronatida var også bemanninga redusert.

Aalen Bjerkvik meiner hotella har lært noko av handteringa av koronatida som vil sitte igjen framover.

- Vi lærte at mindre folk ikkje treng å gi dårlegare service og vi lærte å finne nye inntekter. Men det har også kosta, vi har mista mange folk på vegen, seier ho.

Regna vekk
Etter første halvår i år var driftsinntektene til Quality Hotel Waterfront høgare enn i første halvår i fjor. Men regnet i juli skremde norske turistar vekk og SAS-streiken slo også negativt ut.

Inntektsveksten i høve til fjoråret regna rett og slett vekk i juli, men per i dag er Aalen Bjerkvik tilbake på 2021-nivået og seier utsiktene er gode for hausten.

Med koronapandemien vonlegvis bak oss aukar Aalen Bjerkvik bemanninga. I tillegg kjem lønsauke og markert kostnadsauke mat og andre innsatsfaktorer. Det gjer at Aalen Bjerkvik seier overskotet i år ikkje blir på 2020/2021-nivå.