Mattilsynet vurderer ekstra tid

Wilmann er direktør for avdeling fisk og sjømat i Mattilsynet, og rosar oppdrettarar, utstyrsleverandørar og fiskehelseaktørar i oppdrettsnæringa etter eit møte mellom næringa og Mattilsynet torsdag 11. februar.

Møtet handla om framtida til den viktigaste metoden oppdrettsnæringa har for å halde lakselus-bestanden i sjakk, å gi laksen eit kortvarig bad i vatn mellom 28 og 34 grader.

Les også: Held framleis tommelen ned for varmebehandling mot lus

- Det er tydeleg for meg at dei er opptatt av velferd og at dei jobbar for å forbetre metoden, seier Wilmann etter møtet.

Vil halde fram med varmtvassbehandling
Sommaren 2019 gav Mattilsynet oppdrettsnæringa to år på seg til å dokumenterer at metoden med å køyre laksen kjapt gjennom eit bad med vatn på mellom 28 og 34 grader kan nyttast på ein fiskevelferdsmessig forsvarleg måte.

No ønskjer næringa å kunne halde fram med varmtvassbehandlinga og arbeide vidare både med å utvikle metoden og kartlegge korleis den verkar inn på fisken.

Wilmann seier Mattilsynet fekk presentert observasjonar, systematisk kartlegging, vurderingar og forbetringar av metoden.

Lovar raskt svar
Wilmann seier Matttilsynet no vil vurdere innspela og informasjonen som blei lagt fram på møtet, og lovar tilbakemelding til næringa i løpet av våren.

Dei forskingsprosjekta som det er gitt løyve til kan uansett halde fram, det Mattilsynet skal vurdere er om oppdrettsnæringa kan halde fram og bruke varmtvassbehandling som avlusingsmetode også etter at to-årsfristen er gått ut.