- Dette kan verte like stort som Nordkapp, kanskje større. Der har dei trass alt klart å øydeleggje mykje med eit Scandic-hotel midt oppe på platået.
Vi treff 49-åringen på Kjerringa, eller Vestkapp, som ho helst kallar platået ytst ute på Stad-halvøya.
For no skal merkenamnet Vestkapp utviklast.
- Vi skal byggje ut i pakt med naturen. Her skal vi ikkje ha ein brei veg opp eller nokon stor parkeringsplass på toppen med masse turistbussar.
- Nei, tanken er at cruiseturistar og andre skal bussast opp dei siste kilometerane med ein elbuss eller annan miljøvenleg transport.

Stad skipstunnel-effekt

Og på toppen vil dei få ei fantastisk utsikt over det farefulle Stad-havet, sydover mot Ervika, Kråkeneset og Bremanger, og nordover mot Sørøyane og Nordøyane, så langt ein kan sjå, og austover mot brear og høge fjell.
- Kjem du langt nok ut mot kysten har du større og lenger utsyn enn om du står på dei høgste fjelltoppane i Norge. Dette vil folk sjå og oppleve, seier Koller-Borg.
Ho håper sterkt på at Stad skipstunnel vert bygt, og at mykje aktivitet vil følgje i dragsuget av dette unike prosjektet.
Saman med sin sveitsiske ektemann Pascal Koller, Florida-baserte Olav Refvik og Kristina Leknesund Myrseth, har ho kjøpt to tomter på totalt sju mål på Vestkapp.
- På den eine sida har vi naturreservat og friluftsomåder, på den andre beitemark, og det går heilt fint, seier Koller-Borg.

Vil ha 10-15 landskapsrom

Kristina Leknesund Myrseth driv dagens restaurant. Den utdanna kokken har flytta heim frå Bergen til Selje, og satsar på matservering med lokale råvarer på Vestkapp.
- Det er berre så bra at ungdom flyttar tilbake og utviklar regionen. Planen er at vi skal skape meir aktivitet som får fleire til å ville flytte hit eller ganske enkelt å bli buande, seier Koller-Borg, som er medspelar og medinvestor.
På idéskissa ligg også bygginga av eit opplevingssenter, og ikkje minst 10-15 landskapsrom for overnattingsgjester.
- Dette vert små bueiningar spreidde utover. Vi ser føre oss at dei vert bygde i stein og med store vindu med utsikt mot havet. Tenk å kunne vakne opp i eit slikt rom midt ute på Vestkapp!

- Perler på rekke og rad

Liv Koller-Borg er også sentral i bygginga av nye Selje hotel, ho har engasjert seg i styringsgruppa for Selja kloster og dreg i ei masse trådar frå sin nye base i tidlegare Galleri Amdam i Selje.
Her bur familien når dei ikkje er i Zürich i Sveits, der paret har budd dei siste åra.
- Det vert mykje Selje og Vestkapp framover, kanskje også permanent. Heldigvis brenn også Pascal for denne regionen.
- Her er perler på rekke og rad. Det gjeld berre å synleggjere dei på ein god og berekraftig måte, til det beste for alle som bur her i regionen.

Oppdrag over heile verda

Liv Koller-Borg har levd eit hektisk liv etter at ho som 16-åringen flytta frå Åheim, der ho vaks opp.
Utdanninga som siviløkonom vart tatt i Tyskland, seinare ein master i internasjonal finans i Rotterdam, før det vart jobb for Arthur Andersen-konsernet, først som finansrådgivar, basert i London.
- Eg hadde oppdrag over heile verda, som USA, Kazakhstan, Malaysia, Korea og Island.
Spesielt var det selskap med økonomiske og andre utfordringar som vanylvskvinna fekk i oppdrag med å hjelpe.
Deretter vart det jobb i Deloitte, også i London, og seinare det sveitsiske reassuranseselskapet Swiss Re med base i den sveitsiske finanshovedstaden Zürich.
Undervegs hadde ho møtt mannen Pascal, som også var finansrådgivar, og saman har dei fått to barn med dei Selja kloster-inspirerte namna Sunniva og Mathias.

Karriærekvinne

Liv Koller-Borg legg ikkje skjul på at ho var ei typisk karriærekvinne til ho var i midten av 30-åra.
- Eg likte å få stadig nye utfordringane og jobba knallhardt, budde i City of London og i Park Avenue i New York og omgjekk verdas finansfolk.
- Men etter at eg fekk barn har eg roa meg gradvis ned.
Ho seier at ho er i ei ny livsfase no, og saknar ikkje jaget og stresset frå finansverda, sjølv om ho framleis held eit høgt tempo.
- Eg ønskjer å gi noko tilbake til lokalsamfunnet der røtene mine kjem ifrå. Eg har trass alt besteforeldre frå Borgundvåg ytst på Stad og frå Flo indst i Stryn, slik at eg har det beste frå både indre og ytre Nordfjord.
- Eg brenn for heile regionen, og har lyst til å skape noko som vil gi positive ringverknader.

Selje Havhotel

Utbygginga av Vestkapp skal koplast tett opp til utbygginga av nye Selje havhotel, der Koller-Borg er medinvestor og styreleiar.
Også her er det spenstige planar, der naturen skal integrerast med hotellet.
- Det nye hotellet vert ein base for ulike opplevingar og pakketurar, men Vestkapp vert uansett prikken over i-en.
I pakkane kan det inngå aktivitetar som surfing, padling, klatring, sykling, fisking, dykking, øyhopping eller rett og slett avslapping.
- Berre sjå for deg eit bryllaup der ein kan ha mottakinga i Selja kloster, vigsle i Ervik kapellet, lunsj på Vestkapp og middag på havhotellet i Selje. Betre kan det knapt verte!

Vil ikkje ha vindmøller

Den heimvende karriærekvinna er raus med superlativa om Vestkapp og regionen rundt, med eitt unntak.
- Det er heilt forferdeleg at ein har sagt ja til vindkraftutbygging i Vågsøy.
- Turistane som ser vindmøllene utover mot Kråkeneset vert heilt sjokkerte. Det same vart eg.
- Dette er forsøpling av naturen der ein gjer turistperlene våre til industriområde. Rett og slett hårreisande korttenkt, og fleire slike anlegg må vi ikkje få her i regionen.