Meir enn dobla ordreinngang for Vard-verfta

Ordreinngangen til Vard-verfta auka frå 837 millionar euro i 2022 til 1801 millionar euro i 2023.

Det svarar til tre firedelar av auken i ordreinngangen som Vard-eigaren, det italienske Fincantieri-konsernet, hadde i fjor.

Forretningsområdet offshore og spesialskip er ei reindyrka Vard-verksemd,. Det omfattar alt frå fiskebåtar og marinefartøy, til offshorefartøy og vindkraftindustrien.

Vard byggjer også mindre cruiseskip, men på grunn av ordretørken i cruisemarknaden, er det forretningsområdet offshore og spesialskip som sto for både ordreinngang og resultat til Vard-verfta i 2023.

Forretningsområdet skipsbygging omfattar både Vard-verft og Fincantieri-verft.

Auka lønsemd, men minus
Både driftsinntekter og lønsemd auka for forretningsområdet offshore og spesialskip i fjor (sjå tabell under).

Fincantieri oppgir ikkje meir enn driftsresultatet før av- og nedskriving (ebitda) for kvart forretningsområde.

Også konsernet samla sett auka lønsemda frå 2022 til i fjor, men som det går fram av tabellen vart også 2023 eit minusår for Fincantieri.

Les børsmelding frå Fincantieri her

Fleire folk
Berre i løpet av desember hala Vard i land tre milliardkontraktar, og har signert ytterlegare kontraktar i år.

Det er kabelleggarar og skip til vindkraftbransjen det handlar om. og Vard treng fleire folk for å få arbeidet unna.

– I tillegg til rekrutteringa vi gjorde i 2023, må vi tilsette nærare 150 nye medarbeidarar i Noreg i løpet av 2024. Vi treng både produksjonsarbeidar og ingeniørar i alle selskapa våre; Vard Electro, Vard Interiors, Seaonics, Vard Design, og på de tre verftene våre, sa Vard-sjef Alberto Maestrini i ei pressemelding i slutten av januar i år.