Meir laks og betre pris

Atlantic Sapphire, som driv landsbasert lakseoppdrett ved Miami i Florida, rapporterte om stabil vasskvalitet, stabile temperaturar og auka slaktevekt i 1. kvartal. 

Selskapet har tidlegare varsla at det vil tilpasse produksjonen til kapasiteten i anlegget. Det betyr ei nedskalering, og i første kvartal kasserte selskapet 154 tonn småfisk for å tilpasse seg til den kapasiteten anlegget har.

Slakta meir og fekk betre betalt
I første kvartal slakta selskapet 1219 tonn laks, mot 670 tonn i 4. kvartal i fjor (sløyd vekt).

Gjennomsnittleg slaktevekt steig i same periode frå 2,4 til 3,1 kilo og gjennomsnittsprisen frå 7,9 til 8,3 dollar per kilo.

Les børsmelding her

Ved utløpet av første kvartal hadde Atlantic Sapphire 2997 tonn laks ståande i anlegget, mot 3180 tonnved utløpet av fjerde kvartal 2024.

Er både innanfor og utanfor
Med produksjon i USA er Atlantic Sapphire innanfor tollmurane som USA reiser mot omverda, mellom anna mot norsk oppdrettslaks. Samstundes får selskapet fôr frå Canada, noko som gjer at det ser etter alternativ for å unngå toll på fôret.

Etter at Atlantic Sapphire onsdag morgon kom med oppdateringa for første kvartal, skaut aksjekursen oppover frå seks til 9,90 kroner aksjen, og handelen blei mellombels stoppa av Oslo Børs.