Merkar at fleire reiarar dokkar skipa i Norge

- Det ser veldig bra ut hittil i år, seier dagleg leiar Roger Kaldhol i Davi Turbo.

Herøy-selskapet har spesialisert seg på på vedlikehald og reperasjon av turbomotorar, og har totalt 12 turboverksted i Skandinavia, der ni ligg i Norge.

- Veksten er først og fremst i Norge. Vi merkar at mange norske reiarar no dokkar skipa sine i Norge i staden for i utlandet, seier Kaldhol.

Starta bra før koronaen
Selskapet har vakse raskt, og kjøpte for to år sidan Perssons Maskinservice i Lysekil, og fekk dermed tilgang til eit 1.000 kvadratmeter stort lager og verksted.

Totalt har Davi Turbo meir enn 1.500 turboar og rundt 20.000 ulike artiklar på lager.

I fjor vart det derimot ein nedgang i omsetninga frå 22,4 millionar kroner i 2019 til 17,3 millionar i fjor.

- Året starta veldig bra, med rekordhøg ordreinngang. Deretter kom koronaen, og resten av året dreia seg om å gå nokolunde i balanse.

- Ein knallstart
Men starten på 2021 er endå betre enn starten på fjoråret.

- Eigentleg ein knallstart på året. Det er heilt tydeleg at mykje vart sett på vent i fjor. No har reiarane kome på bana igjen, og aktviteten er aukande.

(Saka held fram etter tabellen)

Kaldhol seier at selskapet har mest arbeid for fiskeflåten og den kystnære trafikken.

- Men i år har også ein del supplyreiarar kome tilbake, blant anna ved at båtar i opplag har kome tilbake i arbeid. Dermed vert det også behov for dokking og oppgradering av utstyr.

Roger Kaldhol og familien eig sjølv 80 prosent av selskapet, medan resten er eigd av Mats Bergrud Sundbø.