Mindre fisk og høgare pris

Villfisksegmentet til Lerøy Seafood Group-konsernet omfattar fiskebåtreiarlaget Lerøy Havfisk i Ålesund og fiskeindustribedriftene i Lerøy Norway Seafood i Nord-Noreg. Samla sett fall inntektene til villfisksegmentet 19 prosent i fjor. Lønsemda, målt i driftsresultat i prosent av inntektene, fall  frå 15,7 til 4,9 prosent. 

I fjerde kvartal auka fangstverdien per dag i fjerde kvartal, og også lønsemda (sjå tabell), sjølv om det vart fiska mindre enn i same kvartal i 2023. 

Les børsmelding med kvartalsrapport per 4. kvartal 2024 her

Forklaringa er ein kraftig prisauke. Prisen på torsk, hyse og sei var høvesvis 56 prosent, 142 prosent og 53 prosent høgare i fjerde kvartal i fjor samanlikna med fjerde kvartal i 2023. Det hjelper også på at drivstoffprisen var redusert med 26 prosent og drifvstoff-forbruket per drifsdøgn med sju prosent, slik at drivstoffkostnadane vart redusert med 28 millioner kroner samanlikna med fjerde kvartal i 2023.

Tøft på land
Samanlikna med 2023 fekk Lerøy Havfisk redusert torskekvoten med 34 prosent, hysekvoten med henholdsvis 43 prosent og seikvoten nord for 62  grader ned seks prosent.  Dette er dei tre viktigaste fiskeslaga for både fiskebåtreiarlaget og landindustrien.

Nedgangen i kvotane er tøffast å handtere for industrien, fordi den får mindre fisk å vidareforedle samstundes som den fisken som kjem på land kostar meir. 

"Den sterke reduksjonen i kvotene med tilhørende sterkt økende priser på råstoffet påvirker både aktivitetsnivået og bruttomarginen.", skriv Lerøy Seafood Grop i kvartasrapporten. 

Kritiserer kvotemeldinga
I fjor vart det vedtatt endringar i fordelinga av fiskekvotane mellom ulike fartøy og fartøygrupper, etter behandlinga av regjeringa sin kvotemelding. Mellom anna vart den såkalla trålstigen gjeninnført. Det betyr at dei minste fiskefartøya får ein større del av den samla kvota når kvotane er låge, og dei største fartøya - mellom dei Lerøy Havfisk sine - får ein større andel når kvotane er høge.

Lerøy Seafood Group kritiserer endringa og konkludere med at det kan gå ut over arbeidsplassar i Nord-Noreg:

"Som følge av regjeringens vedtatte kvotemelding og gjeninnføring av trålstigen er Havfisk sin kvote av torsk blitt redusert mer enn den generelle kvotenedgangen i Norge. Lerøy er en av de største private arbeidsgiverne i Nord-Norge, sysselsettingen bak selskapets kvoteenheter er betydelig. Det er trist å konstatere, men omfordeling av kvoter fra Lerøy vil medføre videre nedbygging av arbeidsplasser i hvitfiskindustrien i Norge.", heiter det i kvartalsrapporten.