Nedskriving hos Rem Offshore

Nedskriving skjer "utover plan", i følgje kvartalsrapporten for første kvartal, som nettopp er offentleggjort.
Samstundes varslar selskapet at det blir gjort ei ny, og meir omfattande verdivurdering i samband med kvartalsrapporten for andre kvartal i år. Det kan føre til nye nedskrivingar:
"Styret legger til grunn at skipsverdiene vil svekkes ytterligere dersom markedsforholdene ikke endrer seg til det bedre. Selskapet mottar megleranslag halvårlig og neste rapportering hvor det vil bli foretatt en grundigere gjennomgang av skipsverdiene i balansen kommer i forbindelse med 2. kvartalstallene," skriv selskapet i kvartalsrapporten.

Skriv ned konstruksjonsskip

Nedskrivinga i første kvartal er knytt til eitt segment, konstruksjonsskip.
Rem Offshore har eitt konstruksjonsskip i drift og eitt under bygging, og det er verdien av skipet som er under bygging og som skal leverast i 2018 som blir nedskrive med 30 millionar kroner.
- Det er utviklinga i marknaden, seier administrerande direktør Arild Myrvoll om årsaka til nedskrivinga.
Til saman er flåten på 19 farty, medrekna nybygget.

Eksperthjelp

Selskapet har leigd inn ABG Sunndal Collier som finansiell rådgivar og Wikborg, Rein & Co som juridisk rådgivar i "i arbeidet med å sikre en langsiktig og bærekraftig kapitalstruktur for selskapet", heiter det i kvartalsrapporten.
Storaksjonær Åge Remøy i Rem Offshore selde nyleg reke- og kvitfisktrålaren "Hopen" for å frigjere kapital til å kome gjennom offshorekrisa.

I februar selde reiarlaget "Rem Forza" til Maersk Shipping for rundt 450 milionar kroner.