No er det klart for Yrkes-NM

(NPK-NETT.NO): 1.–3. april samlast Noregs beste unge fagarbeidarar til noregsmeisterskap i yrkesfag i Førde. 

Nær 100 deltakarar konkurrerer i ti fag, medan over 7.000 besøkjande får oppleve utdanningsmesse og «Prøv eit fag»-aktivitetar.

Måndag 31. mars er det opningsseremoni på kvelden, dagen etter går startskotet for første konkurransedag i Yrkes-NM 2025. I tre dagar skal Noregs fremste unge fagarbeidarar konkurrere om å bli best i faget sitt.

– Det er ei fantastisk moglegheit for ungdom til å oppleve faga på nært hald, seier dagleg leiar i WorldSkills Norway, Bjørnar Valstad, i ei pressemelding.

– Her får ein sjå Noregs beste unge fagarbeidarar i aksjon og sjølv kjenne på meistringa ved å prøve eit yrkesfag, seier han.

Yrkes-NM 2025 blir kombinert med ei stor utdanningsmesse, der publikum kan møte bransjeaktørar og teste ulike yrke i praksis. Over 7.000 besøkjande er venta, dei fleste skuleelevar og ungdom i utdanningsval.

Arrangementet er eit samarbeid mellom WorldSkills Norway, Vestland fylkeskommune, lokale opplæringskontor, fag- og bransjeorganisasjonar og lokalt næringsliv.

Konkurransegreinene er:

*NM Anleggsgartnarfaget

*NM Anleggsmaskinførar

*NM Tømrarfaget

*NM Betongfaget

*NM Persontransport

*NM godstransport

*NM Automatisering

*NM i sveisefaget

*NM i Industrimekanikarfaget

*NM i Helsefagarbeidar