Nogva Motorfabrikk kjøpte for fleire år sida bygget som tidlegare husa vindusprodusenten H-Produkter på Haramsøya, med tanke på å ta det i bruk når Nordøyvegen opna.

Les også: Satsar 4,5 millionar på Nordøyvegen

Planen var å legge utvikling og produksjon av hybrid- og elektriske motorar dit, fortalde dagleg leiar og medeigar Kjell Norvoll i Nogva Motorfabrikk då han og andre motstandarar av vindkraftutbygging på Haramsøya og i havet utanfor møtte statsminister Erna Solberg tysdag kveld.

No er planen om fabrikketablering i bygget på Haramsøya lagt på is.

- For oss er det ikkje lenger aktuelat, sa Norvoll til statsministeren.

Nogva Motorfabrikk-konsernet har 120 tilsette, har hovudkontor og produksjonsanlegg i Søvika i Haram, og anlegg på Grytastranda. Konsernet er også største eigar i Nogva Heimdal Propulsion i Molde. Bygget på Haramsøya blir i dag brukt som lager.

Uråd å rekruttere
Norvoll håpar framleis det er råd å stoppe utbygginga, men dersom vindkraftmotstandarane ikkje lukkast med å stogge utbygginga blir det ikkje fabrikk i bygget, seier han til NETT NO.

- Då satsar oss ikkje der, seier han.

Grunnen er at Norvoll reknar med at det blir så lite attraktivt å bu på Haramsøya at selskapet ikkje klarer å rekruttere folk, og spesielt ikkje spesialistar utanfrå, der naturen i havgapet kunne vere eit ekstra trekkplaster for å bu og jobbe på Haramsøya.

Ventar på rettsak
Vindkraftmotstandarane har gått til rettsak for å stogge utbygginga, og argumenterer der med at sakshandsaminga før løyvet til å bygge ut vart gitt ikkje oppfyller krava til forsvarleg sakshandsaming.

Målet er i første omgang å få ein mellombels stans i bygginga, før ei ny rettsak.

Regjeringa konkluderte 9. oktober at det ikkje er grunnlag for å trekkje tilbake løyva til å bygge ut.

Les også: Stoppar ikkje vindkraftarbeid på Haramsøya