Ny smell for Atlantic Sapphire

Det landbaserte oppdrettselskapet Atlantic Sapphire, med hovudkontoradresse i Vestnes og oppdrettsanlegg ved Miami, skal nok ein gang ut i marknaden og hente meir eigenkapital.

Det blei ikkje godt mottatt blant investorane i aksjemarknaden. Meldinga blei sendt ut like før midnatt, natt til i dag. Då børsen opna i dag fall kursen til 5,11 kroner i løpet av ein time og 20 minutt. Ved børsslutt i går var kursen 10,42 kroner.

Aksjekursen tok seg litt opp i løpet av dagen og var seks kroner aksjen då børsen stengte. Det er ned 42,42 prosent sidan i går.

Atlantic Sapphire skriv at selskapet tidlegare har meldt at det har prioritert å få opp slaktevekta per fisk, noko som har gjort at det har færre fisk i anlegget. Konsekvensen er at det tek lenger tid om å nå målet om eit overskot på drifta før av- og nedskrivingar (ebitda). Det nye målet er at det skal skje etter fjerde kvartal i år. 

I siste 12-månadarsperiode har Atlantic Sapphire-kursen falle over 98 prosent. Hittil i år er kursfallet 67 prosent.