Oljeprisen har stige 24 prosent på ei veke og passerte natt til i dag 130 dollar fatet. Det er høgaste pris sidan like før finanskrisa slo inn, i 2008.
Fredag 4. mars var prisen for eitt fat nordsjøolje for levering om ein månad 118,3 dollar fatet.
- Det er hamstring, siterer Wall Street Journal RBC Capital Markets-analytikar Michael Tran. Han peikar på at prisen for å leige ein oljetankar for å frakte olje frå Persiabukta til Asia har gått opp med 83 prosent på ei veke.
Oljekjøparane kjøper det dei kan for å bygge opp lager i tilfelle olje frå Russland blir enda vansklegare å få kjøpt framover, som ein følgje av krigen i Ukraina og vestlege sanksjonar mot den.
Oljekjøparar er allereie redde for å kjøpe russisk olje, og er uvisse på om det kjem direkte sanksjonar mot russisk oljeeksport.
Publisert: 07.03.2022 07:48
Sist oppdatert: 07.03.2022 07:50
