Olympic-pluss i tredje kvartal

Forhandlingane om ei refinansiering av Olympic Subsea vart varsla då selskapet la fram reknskapen for 3. kvartal 2019, og fristen for å bli samde er utsett fleire gongar. Den siste fristen er førebels 15. desember i år, går det fram av kvartalsrapporten for 3. kvartal 2020.

"Det er framleis usikkert om og eventuelt på kva vilkår selskapet kan få til ei lengre løysing, og selskapet er framleis i brot med lånevilkåra, med tilhøyrande kryssmisleghald under selskapets obligasjonslåneavtalar," skriv selskapet i kvartalsrapporten.

10 av 11 skip i arbeid

Olympic Subsea hadde 10 av 11 skip i arbeid ved utløpet av 3. kvartal.
I fjerde kvartal har reiarlaget sikra arbeid også i 2021 for fire skip, Olympic Delta, Olympic Artemis og Olympic Orion og eitt ikkje namngitt skip som skal leigast ut i samband med bygging av eit vindkraftanlegg til havs i Frankrike. Den avtalen vil gi arbeid både i 2021 og 2022, i følgje selskapet.

Optimistisk Remøy

Då Stig Remøy deltok på eit arrangement i regi av Norges Rederiforbund tidlegare i dag fortalde han at han er med i ei gruppe som arbeider for å etablere eit fond for å finansiere kondemnering av offshorefarty.
Lukkast det er kan han kome til å bestille ny båt alt neste år.
– Det viktigaste er at verkemiddelapparatet er til stades og at vi får til dei finansieringsordningane som er lagt inn i stortingsmeldinga. Om det blir gjennomført saman med desse endringane for GIEK, så kjem Olympic-systemet til å kontrahere båt i 2021, sa han til NETT NO.