Over 900 millionar til Hexagon

Hexagon Composites har fått inn 907 millionar kroner i ny eigenkapital etter at selskapet gjekk ut i marknaden i går ettermiddag.
Kapitalutviding blei gjort i samband med at selskapet skal skille ut og børsnotere datterselskapet Hexagon Purus, som lagar drivstofftankar og -system for hydrogendrivne personbilar, lastebilar, bussar, tog og skip.

Meir enn venta

Planen var å hente inn 800 millionar kroner frå investorar i Noreg, men interessa for å bli med var så stor at selskapet enda med å hente inn 907 millionar kroner, . Det tilsvarer omlag 10 prosent av børsverdien av Hexagon Composites før kapitalutvidinga.
Hexagon Composites skal vere stor aksjonær i Hexagon Purus og pengane frå kapitalutvidinga skal brukast til å finansiere oppbygginga av Hexagon Purus.

Flakk-familien storaksjonærar

Hexagon Composites har hovudkontor i Ålesund med Knut Flakk og familie som nest største aksjonær. Selskapet lagar drivstoff-tankar i kompositt, frå små gassgrillbehaldarar til store transportable gasstankar. Den største verksemda er å lage drivstofftankar og - system for bussar og lastebilar som gå på naturgass.
Sjølv om hydrogensatsinga gjennom Hexagon Purus berre er ein mindre del av verksemda til Hexagon Composites er det forventningane til utviklinga i hydrogenmarknaden som har drive aksjekursen til rekordhøgder den siste tida.
Ved børsslutt i går kveld var Hexagon Composites verdsett til 9,2 milliardar kroner. Det er 39 prosent høgare enn ved starten av 2020 og 95 prosent høgare enn for eitt år sidan.