Rapport: Folk flest vil framleis jobbe heimanfrå

NPK-NTB-Bibiana Piene: Koronapandemien sende titusenvis av arbeidstakarar på heimekontor. Og det ønskjer mange å halde fram med, ifølgje rapporten «heime – borte – uavgjort», som blir lagt fram tysdag.

Rapporten er laga av forskarar ved Oslomet på oppdrag frå Arbeids- og inkluderingsdepartementet (AID) og er mellom anna basert på ei spørjeundersøking blant vel 5.000 arbeidstakarar.

Mindre stress
I snitt ønskjer dei fleste å kunne jobbe heimanfrå to dagar i veka.

Både tilsette og leiarar melder om at produktiviteten ikkje går ned på heimekontor, snarare tvert om. Mange opplever betre arbeidsro rundt konsentrasjonskrevjande arbeid.

– Heimekontor kan føre til oppleving av meir fleksibilitet og mindre stress i kvardagen, særleg for arbeidstakarar som er foreldre. Denne fleksibiliteten er eit veldig stort gode som gjer at foreldre kan jobbe meir og får mindre kvardagsstress, heiter det i rapporten.

Eit anna funn er at sjukefråværet og graden av utbrentheit går ned i takt med jobbing heimanfrå.

Baksider
På den andre sida kan heimekontor gjere det utfordrande å ikkje jobbe sjølv om ein er sjuk eller passar på nokon som er sjuke, og det kan bli forventa at ein er tilgjengeleg også utanfor ordinær arbeidstid, påpeikar forskarane.

For skiljet mellom arbeid og fritid blir gjerne viska ut når ein jobbar heimanfrå. Arbeid utanom ordinær arbeidstid aukar når heimekontorhyppigheita aukar, viser rapporten.

– Blant dei viktigaste spørsmåla å stille er kor grensene skal gå mellom arbeidstid og fritid når arbeidstakarar potensielt kan jobbe kor og når som helst, og kven som har ansvaret for å trekkje desse grensene, heiter det i rapporten.

Ei anna bakside er at mange opplever at dei mistar gneisten når dei jobbar mykje heime, og yngre arbeidstakarar kan kjenne på at opplevinga av meining på jobben blir mindre. Dette skjer gjerne når ein går frå å jobbe månadleg eller sjeldnare på heimekontor til kvar veke.

Eit mindretal trivst dårleg på heimekontor og slit med manglande motivasjon, einsemd og utbrentheit. Samtidig vil også denne gruppa gjerne behalde fleksibiliteten som heimekontor fører med seg.

Står i spagaten
Leiarar som har delteke i undersøkinga, bekymrar seg for utbreidd bruk av heimekontor på sikt. Dei fryktar at det sosiale arbeidsmiljøet, kompetansehevinga og det langsiktige utviklingsarbeidet i verksemdene blir skadelidande.

Bedrifter og verksemder står dermed i ein spagat, påpeikar forskarane: På den eine sida prøver ein å leggje til rette for ønskjet til dei tilsette om fleksibilitet, og på den andre sida å halde oppe eit fellesskap på arbeidsplassen for å sikre utvikling og innovasjon og eit godt psykososialt arbeidsmiljø.