Regjeringa vil ikkje løyse opp Vestland fylke

Vestland fylke må sjølv vedta å løyse opp fylkeskommunen ifølgje den nye regjeringsplattforma til Arbeidarpartiet og Senterpartiet.

Den påtroppande Sp-Ap-regjeringa opnar opp for å løyse opp Troms og Finnmark og Viken, men det blir verken folkerøysting eller omkamp i Vestland, skriv NRK Vestland.

Fylkesleiar Sigurd Reksnes i Sogn og Fjordane Senterparti er skuffa.

– Vi hadde håpa at regjeringa sjølv skulle ta initiativ til å gjennomføre folkerøysting i dei tidlegare fylka, det var det som var bestemt i programmet til Senterpartiet. Dette var ein skikkeleg nedtur, seier Reksnes til NRK.

Sterk motstand
I ei måling frå april svarte 63,5 prosent av dei spurde i tidlegare Sogn og Fjordane at dei ville løyse opp storfylket Vestland. Berre 2,5 prosent ville halde på Vestland i ei folkerøysting.

Einaste måten å få splitta Vestland på, er at fylkestinget vedtek å sende ein søknad om dette innan 1. juli 2022. Men der er i dag fleirtal i Vestland fylkesting for å halde på samanslåinga.