Reiarar legg skip i koronaopplag

- Vi synst dette er fornuftig i den situasjonen vi er i no.
Det seier dagleg leiar Sølve Høyrem ved skipsmeklarfirmaet Westshore i Kristiansand.
Nye opplag vil i så fall bety ei ny runde med omfattande permitteringar i offshore.
- Med dagens gode permitteringsreglar kombinert med få og dårlege kontraktar, vil det vere fornuftig å leggje ein del skip stilt for ein periode.
- Vi kallar det for koronaopplag, seier Høyrem.

Reknar med fleire

Av skip som siste dagane er lagde i opplag er Olympic Promoter som ligg i opplag i Fosnavåg, og Farland som ligg i Ålesund.

Også Bourbon-skipet Bourbon Topaz er lagt til kai på Fiskå.
På Westshore si liste over nye PSV-ar i opplag er også Sartor og Stril Mermaid.
- Vi reknar med at det kan bli fleire, seier Høyrem.

Tiltak mot smittespreiing

Bakgrunnen for den reduserte aktiviteten er at ei rekkje oljeselskap kuttar kostnader på grunn av oljeprisfall, men like viktig er at ein set i verk ei rekkje tiltak for å redusere risikoen for at dei tilsette skal verte smitta av covid-19.
- Dette har ført ein kraftig redusert etterspørsel etter PSV-ar i spotmarknaden, fastslår skipsmeklaren Seabrokers.

I siste magasinet Seabreeze blir det vist til at den uventa effekten av koronaviruset er i ferd med å få dramatiske følgjer for spotmarknaden i Nordsjøen.
Ei effekt er tiltak for å hindre smitten, men fleire aktivitetar har også stoppa opp fordi ein har fått problem med å skifte mannskap.
Utover i månaden vart stadig fleire PSV-ar lagt til kai etter å ha avslutta oppdrag, slik at det i slutten av veka berre var att 25-30 PSV-ar tilgjengelege i spotmarknaden.

Ventar med dyr klassing

Samstundes stupte spotratene, der enkelte reiarar måtte innsjå at skipa vart utleige til rater ned til 45.000 kroner døgnet, langt under kva driftskostnadene er.

- Vi trudde alle at vi hadde lagt bak oss slike dagar, skeiv Seabrokers.
Samstundes er det ei rekkje skip som frå før ligg i opplag, og der andre ventar på å få gjennomført den faste femårsklassinga.
Seabrokers trur at mange reiarar vil avvente med å gjennomføre dyre klassingar.
- Det er ein modig reiar som i dag betalar kostnadene med femårsklassing om sertifikatet er i ferd med å utløpe, utan å ha ein kontrakt for skipet.

- Ikkje heilsvart

Til NETT NO seier skipmeklar Sølve Høyrem i Westshore at situasjonen ikkje er heilsvart.
- Det positive er at oljeselskapa ønsker at situasjonen skal normalisere seg så fort som muleg.
- Eit prishopp på olje vil truleg også føre til ein kraftig rekyl.
Men Høyrem seier at det meste er usikkert for tida.
- Vi veit ikkje kor lenge covid-19-utfordringane vil vare, men 2020 vert uansett ikkje det året som vi håpa på.