NETT NO/NPK-NTB: Medan bustadbygginga har falle på landsbasis i år, har den auka i Møre og Romsdal.
Forklaringa til Holsvik kan vere ein av grunnane.
- Dei eg har snakka med (av større konkurrentar og samarbeidspartnarar, red. merk) rapporter om eit utypisk godt sal, seier Holsvik om bustadsalet i februar i år.
Det gode salet gjorde at han og andre i byggebransjen fekk fyllt opp ordreboka før koronaepidemien kom, og bremsene blei sett på.

Koronastille i seks veker

I løpet av seks veker selde ikke Holsvik eit einaste bygg, men etter at barnehagar - og delvis skulane - opna, endra det seg.
- Berre denne veka åleine har vi seld for 11 millionar, seier Holsvik.
Salet denne veka ser han meir som ein rekyl etter fleire vekers stillstand, men i løpet av sommaren ventar han ei normalisering i marknaden, som gjer at nedgangen i byggeaktiviteten i august/september på grunn av få og ingen sal under koronanedstenginga i mars og april ikkje treng blir så langvarig.

Byggeoppgang i Møre og Romsdal

I Møre og Romsdal er det sett i gang bygging av 36 prosent fleire nye bustadar hittil i år samanlikna med same periode i 2019.
På landsbasis er det til samanlikning ein nedgang på 11 prosent, viser tal frå Boligprodusentenes Forening for årets fire første månader.
Medan bygginga går opp i Møre og Romsdal går salet av nye bustadar ned i årets fire første månader, både i Møre og Romsdal (minus 42 prosent) og på landsbasis (minus 45 prosent).

Bekymra bransjeforening

Boligprodusentenes Forening er bekymra over nedgangen på landsbasis og vil ha statlege støttetiltak.
– Det kan bli ganske svart for næringa, sa administrerande direktør Per Jæger i Boligprodusentenes Forening i samband med framlegginga av apriltala onsdag.
Så mange som 34.000 arbeidsplassar kan ha forsvunne frå byggjenæringa når dei neste ti månadene har passert, viss ikkje rammene til Husbanken blir auka med 25 milliardar kroner og staten stiller opp med garantiordningar for den delen av næringa som byggjer leilegheiter, ifølgje Jæger.
Han reknar med at auka husbankrammer på 25 milliardar kroner vil sikre finansiering av 10.000 nye bustader og reknar 3,4 årsverk per bustad. Bustadbyggjarane ber òg om ei statleg garantiordning som gjer at berre 30 prosent førehandssal er nok før ein går i gang med nye leilegheitsprosjekt.