Rekordår for Lyngvær

2017 blei eit rekordår for Fishtech Hygena i i Hundeidvika i Sykkylven. Selskapet meir enn dobla driftsinntektene, til 26 millionar kroner, og sat att med eit overskot på to millionar (sjå tabell).
Selskapet er oppe i åtte tilsette. Før konkursen var dei ni.
Hovudverksemda til Fishtec Hygena er å lage og montere vegg- og takplater til næringsmiddelbedrifter. I fjor var det bedrifter i laksebransjen som dominerte kundelista. I år er det bedrifter i pelagisk industri (som tek i mot og beabeider sild, makrell og liknande fiskeslag).
I fjor sto leveransar til næringsmiddelindustrien for driftsinntekter rundt 15 millionar kroner. Det er rundt fem millionar kroner meir enn i 2016.

Bonus

I tillegg prosjektere selskapet fabrikkanlegg til fiskeforedlingsbedrifter, og leverte i fjor to prosjekt til russiske kundar.
Dagleg leiar og eigar Bjørn Idar Lyngvær seier dette er ein verksemd som er ein rein bonus for selskapet, som ikkje bind opp kapital eller ein omfattande arbeidsinnsats ut over det han gjer sjølv.

Fullt opp til august

Selskapet har oppdrag med leveransar til næringsmiddelindustrien til august/september. Med dei oppdraga som selskapet har sikra seg så langt i år har Fisctech Hygena allereie passert fjorårets driftsinntekter frå næringsmiddelindustrien.
- Vi har hatt ein veldig god start, seier Lyngvær om byrjinga på 2018.
Då NETT NO snakka med Lyngvær i fjor vår hadde Fishtech Hygena tre tilsette. No er dei åtte, og Lyngvær er på utkikk etter forhandlar-/montørbedrifter som kan sikre selskapet innpass i andre landsdelar. Er det snakk om store oppdrag kan han sende folk sjølv, men for mindre oppdrag er det betre å samabeide med lokale bedrifter, meiner han.

Blokkerte kai

Under Dagmar-orkanen i 2011 gjekk den russiske trålaren "Krasnoselsk" ned ved kai hos Fishtech i Hundeidvik.
Vraket blokkerte tilgangen til kaia medan det ikkje blei semje om kven som hadde ansvaret for fjerne det. Det var ei viktig årsak til at Fishtec gjekk konkurs i 2014, etter Lyngvær si vurdering.
Fishtech hadde tre avdelingar, ei som driv montering av utstyr på fiskebåtar, ei som dreiv med innreiing av næringmiddelindustri-bygg og ei som dreiv med sandblåsing og overflatebehandling.
Då Lyngvær kjøpte attende buet etter konkursen og etablerte Fishtech Hygena satsa han på å gå vidare med avdelinga som dreiv med innreiing av næringsmiddelindustri-bygg. Den er ikkje avhengig av kai, men med Lyngvær har likevel fått flytta skipsvraket ut på djupare vatn, slik at han no har kai disponibel igjen.