Rett opp for Vertikal Service

Det som byrja med utbetring av kirketårnet i Volda for 20 år sidan har blitt ein selskap som no har 125 tilsette, med oppdrag over heile Noreg og også i utlandet, på oljeinstallasjonar, på vasskraftverk og vindturbinar.

I fjor hadde selskapet 90 millionar kroner i driftsinntekter, i år ligg driftsinntektene an til å bli 121 millionar kroner, seier grunnleggar, hovudaksjonær og driftsdirektør Åsmund Vaage.

I fjor investere selskapet tungt i utvikling og kompetanseheving. Det gjorde at selskapet gjekk ut av 2022 med 1,5 millionar kroner i minusresultat, men investeringane betaler seg i år seier han.

Starta i kirkespiret
Ideen til det som blei Vertikal Service starta med ein debatt i lokalmiljøet om behov for utbetring av kirkespiret i Volda, fortalde Vaage då han presenterte historia til selskapet på Næringskonferansen Søre Sunnmøre i Ørsta i dag

Vaage, med si klatreerfaring, kom med ideen om at klatrekompetansen og -teknikken kunne brukast for å få kirketårnet reparert - og fekk jobben.

Inn i oljebransjen
I 2008 gjekk Vertikal Service inn i oljebransjen. Det gjekk bra heilt til oljeprisfallet i 2014.

I 2016 flata det ut. Då var arbeidsstokken redusert frå 40 til 11-12.

- Eg hadde trua på at dette var ein dipp, sa Vaage til forsamlinga.

Det fekk han rett i, og i 2018 var selskapet attende på same driftsinntekt som i 2014.

Meir fornybar
Erfaringa frå oljenedturen gjorde imidlertid at Vaage såg seg om etter eit nytt bein å stå på, for å ikkje vere så avhengig av ein bransje.

Det lukkast. I dag utgjer oppdrag på vindkraft- og vasskraftanlegg omlag halvparten av driftsinntektene til selskapet.